Watla ïaid bad tam shiteng bnai mynta jong u Nailur, ka jingshit bad jinglhop jong ka suiñ bneng ha nongbah Shillong bad wat sha kiwei ki bynta ka dang neh bad khluit kumba ju long ha ki aiom lyiur. Ka jingshit ka long shisha kaba jur bha bad watla ka don ka jinghap jong u slap hynrei kane ruh kam da wanrah jingtngen hynrei ka wanrah pynban ka jinglhop. Katkum ka jingtip ba la ai da ka Meteorological Centre, Shillong halor ka jinglong jingman ne ka jingshit ka suiñ bneng ha ka 21 tarik mynta u bnai kaba dei ka Sngi Nyngkong, ha Shillong ka jingshit ka la long 27.8 Degree Celsius, ha Sohra ka la long 29.5 Degree Celsius bad ha ka thaiñ Umiam ka jingshit ka la long haduh 31 Degree Celsius.
Kane ka jingïai bteng jong ka jingshit ka suiñ bneng watla poi sha ki taïew ban kut sa u bnai Nailur, ha kaba ha ki snem kiba la leit, la ju sdang ban mad ïa ka lyer kaba kham pjah ha ki por janmiet, ka pynpaw ba ka jingkylla ka suiñ bneng ka la long shisha kaba pher na uwei u snem sha uwei pat. Namar kane ka jingshit kam dei shuh kaba ngi mad tang ha ka por mynstep bad mynsngi, hynrei wat ha ka por janmiet bad kumjuh ruh ha ka por miet. Katkum ki jingtip kiba rit kiba long ki daw jong ka jingkiew ka jingshit ka dei ka jingpom ïa ki dieng ki siej, ka jingsyllen jong ki khlaw ki btap bad khamtam lei ka jingmih jong ki ïing building kat shaba phai bad ka jingnang bun jong ki kali ki motor kiba khlem ai jingshongthait satia ïa ka mei mariang. Ka jingkiew ka jingshit ym tang ba ka wanrah ka jinglynga ha ki briew, hynrei ngi lap ba ka long pat sa kawei ka daw kaba wanrah ïa ki jait jingpang bapher bapher, namar tang bakla tiak ka bam ne bam ïa ka jingbam kaba la ieh bun kynta ne shisngi ruh ka la wanrah ka jingktah ha ka koit ka khiah jong ka met.
Lah ban kdew ruh ba na ka liang jong ka Sorkar ha ki snem kiba la leit ka la shimkhia ban khmih ïa ki jingtynjuh jong ka jingkylla suiñ bneng lyngba ki saiñdur mat treikam bad ki sienjam bapher-bapher. Nalor kine, ka Sorkar ka la pyntreikam ruh ïa katto-katne ki sienjam ba ïadei bad ka jingkylla suiñ bneng ban khmih ïa ki jingtynjuh jong ka jingkylla suiñ bneng ba kynthup ïa ka State Governing Change Governing Council, Payment for Ecosystem Service (PES), State Water Policy, Carbon Finance Projects , Public Awareness Campaign bad kiwei-kiwei. Kumta, mynta ka la long kaba donkam bha ban shimkhia ha ka ban pynsted ban wad ki lad ki lynti kumno ban ïaleh ban ïada ïa ka mariang bad ban ïada na ka jingkylla jong ka suiñ bneng bad ka jingkiew jong ka jingshit.
Ka jingkylla ka suiñ bneng kam dei eh tang ba ka wanrah ïa ka jingshit jinglhop hynrei namar ka jingduna jong u slap, ka wanrah ruh ïa ka jingeh ha ki nongrep kiba mad pat da kiwei ki jingeh ha ka rep ka riang, kum ka jingtyrkhong jong ki bri ki pynthor, ka jingslem jong ki jingthung jingtep ban heh ban san bad bun bah kiwei pat ki jingeh. Kat shaba ngi phai, ngi la shu ïohi beit tang ïa ki jingtei kiba thymmai. Ngi donkam ïa ki jingtei namar ngi sngewthuh ruh ba kat nangïaid ki por ka jingbun briew ruh ka la nangjur bad ngim lah ban shu ïathynñian tang ha kawei ka jaka hynrei ngi hap ban saphriang bad phet sha ki jaka ba kham kylluid bad haba ngi poi shata, ngi donkam pat ban tei ïa ki ïing ki sem ne kiwei kiwei ki jingtei. Kane hi ka dei ka daw ba hakhmat jong ka jingkylla ka suiñ bneng namar haba tei jingtei la hap ban pynkhyllem ïa ki dieng ki siej bad kumta ter ter. Hynrei ngi hap ban shim ruh ka jingkitkhlieh ban thung bujli pat ha ki jaka kiba lait, hynrei ïa kane ruh yn lah ban leh tang da kito ki briew kiba don ki jaka kiba heh, katba kiba don i jaka ba rit te kan long shisha kaba eh ban thung bujli.
