Kum ka ri tip briew tip blei, ngi dei ban kynmaw ba ngim dei satia ban jubab ïa ka jingsniew da ka basniew namar kane kan ym wanrah satia ïa ka jingbha. Ngi hap ban sngewthuh haba don kino kino ki jingjia ne jingklumar barabor ngi dei ban ïaleh ban tehlakam ïa ka jingbitar namar shisien ba la bakla, kan long pat kaba eh ban pynbeit.
Ïa ki kam batbor ne ki kam thmu batbor ym lah ban ailad satia ha kano-kano ka imlang-sahlang ne ka shnong ka thaw ne ka jaidbynriew, kumjuh ruh ïa ki kam tuh kam thiem ne kiwei pat ki kam runar. Ka jingpynjot ïa ka longrynïeng ka manrynïeng jong ki kynthei khynnah ne longkmie ka long kaei-kaei kaba pynsngewsih haduh katta-katta. Ngi ïohi ïa kiba kum kine ki jingjia ha kylleng ha kaba ym don jingmap shuh wat ïa ki khyllung. Ka jingkwah brai jong ka doh ha ki katto katne ka la long shaba palat liam haduh ba ka ju wanrah ïa ka jingshah pynïap jong kito ki lanot kiba ngat ha ka jingshah batbor. Kim tip shuh ïa ka sang ka ma. Kim tip shuh ïa kaba dei bad kaba lait. Kim tip shuh ïa ka rain ka rem. Kim tip shuh ïa ka jingïatiplem. Kim don shuh ka mynsiem sngewlem. Kim don shuh ïa ka mynsiem sngewsynei ïa ki lanot. Ki thom beit da ka bor wat lada ki sngewthuh ba kin ngat ha ka jingshah pynshitom jong ka aiñ. Kiba kum kine ki briew kiba thombor ïa ka longrynïeng ka manrynïeng jong ki kynthei khynnah bad longkmie ki dei ban shah pynsaja ha ka rukom kaba dei ha ki bor jong ka aiñ bad lyngba ka rai jong ka ïingbishar.
Haba don kino-kino ki jingjia ne lap ïa ki briew kiba donkti ha ki kam sniew, kaba bha tam ka long ban aiti beit sha ki pulit ba kin tohkit bad ban ieh ha ka ïingbishar ban rai la ki la donkti shisha ne em la ka dei ha kino-kino ki kam runar. Kane ka dei ka rukom ha ka pyrthei bad ka juk shai. Ban shim hi halade ïa ka aiñ ka long kaba bakla shibun. Ngi hap ban sngewthuh ba ha kino-kino ki jingjia klumar haba la ïalum paidbah, lehse kin don beit ki nongpynshit, nongai ding ha ka jaka ban pynjai-jai ïa ki paidbah kiba bitar. Ngim don hok ban shim ïa ka jingim jong-no-jong-no kumba ngim don hok ban pynjot ïa ka longrynïeng ka manrynïeng jong-no-jong-no. Lada baroh-baroh ngi shim ïa ka aiñ ha ka kti, kaei ka ban jia? Ngim lah shuh ban batai ïa kata. Ka kput kam ju ïalam sha ka jingbha. Lada kwah ba kiba donkti kin shah pynsaja ha ka rukom kaba dei, ai sha ka aiñ ba kan leh ïa kaba donkam bad ym ban shu rai hi da ka jingbitar.
Kaei kaba ngi lah ban leh kum ki briew ba don jingkitkhlieh ka long ban pynsngewthuh ïa ki nongshong shnong ba ka long be-aiñ bad bakla ban shim ïa ka aiñ halade lane ban bishar hi bad rai hi. Baroh ngi dei ban bud ïa ki kyndon aiñ namar ngi im ha ka juk kaba la shai. Lada ki bor jong ka aiñ kim leh eiei ne ki leh sting ban pynshitom ïa kiba donkti, hangta ki don da kiwei pat ki lad ban ïakhun khnang ban ïoh ïa ka hok. Ka jingbom jingtied ne shim ha kti ïa ka aiñ kam dei ka jubab ha kane ka juk. Ngi dei ban pynsngewthuh lem ïa kiwei ba ka long kaba bakla ban shu bom shu tied ïa ki briew namar ka aiñ ka don ban leh ïa kaba dei ban leh.
