Ki phra ngut ki MLA ka United Democratic Party (UDP), Bah Lahkmen Rymbui, Bah Pius Marwein, Bah Mathew Beyondstar Kurbah, Bah Kyrmen Shylla, Bah Mayralborn Syiem, Bah Olan Sing Suin, Bah Synsharkupar Roy Lyngdoh Thabah bad Bah Balajied Kupar Synrem ki la ïarap ban pynthaw ‘history’ syndon ïa ka Bharatiya Janata Party (BJP) namar kane ka seng ka la ïoh syndon ïa u number 10 ne ban don shiphew ngut ki MLA ha ka Dorbar ba don 60 ngut ki dkhot. Kane ka jingïoh ka BJP haduh 10 ngut ki MLA, kan dei ruh ha ka sien kaba nyngkong eh hapoh Meghalaya, namar shwa kane, kata naduh ki snem ba ka la sdang ban ïakhun, kam pat ju tam ïa ka 3 ngut. Dei ha u snem 1998 ba ka BJP ka la jop 3 ngut ki MLA, kata u Ban AL Hek na Pynthorumkhrah, Bah Thrang Hok Rngad na Laban bad u Nityanarayan Simchang na Dalu Konstitwensi. Lait na une u snem, ka BJP ka jop tang uwei ne ar ngut bad don lei ki snem ba ka ïoh nod.
Kumba ka long naduh mynta ka sngi, ka BJP ka la kylla long syndon ka seng saiñpyrthei kaba wan ha ka kyrdan kaba ar ha ka jingbun paid kata hadien jong ka NPP kaba lamkhmat ïa ka Sorkar. Kane ka jingrung jong kitei ki phra ngut ki MLA sha ka BJP ha ka jingïalang ha nongbah Delhi, ka la pynkhih win ïa ka saiñ pyrthei hapoh ka Jylla. Ngim shym la ïakren ïa ka Sorkar kaba lamkhmat da ka NPP hynrei ïa ka jingmut jingpyrkhat jong ki nongshong shnong namar ym pat ju mad ba kin mih khrui shisien mih ban ryngkang na kawei ka seng sha kawei pat bad khamtam lei lei sha ka BJP kaba kum ki nongshong shnong kim shym la poi pyrkhat satia, watla ka khubor jong ka jingthmu ryngkang diengkper jong kitei ki MLA ka la ïaid bad saphriang bha. Kumba ka long mynta, ngi sngewthuh ba watla ki 8 ngut ki la kynthih na ka UDP bad rung sha ka BJP hynrei kam shym la ktah pat ïa ka jingbun paid jong ka Sorkar namar ka la shu long tang ka jingkylliang sopti. Tang ka por ka ban sa batai kaei pat ka ban jia hadien habud. Ngim lah ban ong ba kane ka Sorkar kan neh ne kan khyllem. Ngi sngewthuh katkum ki khubor ba ka la don ruh ka jingkhih win hapoh ka kynhun jong ka NPP, naba ki la don katto katne ki MLA ki bym sngewtynnad shuh.
Ban da dei ha ki snem kiba mynshwa ba ym pat don jingteh jingkhum ban buh Myntri, tharai ha kane ka Sorkar kin don palat 40 ngut ki Myntri. Hynrei naduh u snem 2004, hadien ba la pyntreikam ïa ka Anti-Defection Law ba la pynkylla, naduh na Sorkar Pdeng bad haduh ki Sorkar Jylla la buh beit thik tang katta ngut ban long Myntri. Kum ha Meghalaya bad kiwei pat ki para jylla barit, ym lah ban don tam palat ïa ka 12 ngut ki Myntri ha ka Sorkar kynthup lang ïa u Myntri Rangbah. Namarkata, ki Myntri Rangbah ki shem jingeh tang ïano ban kynthup bad tang ïano ban weng na ka kynhun Myntri.
Kane ka jingjia mynta ka sngi ka pynkynmaw ruh ba ka saiñ hima sima ha Meghalaya ka dei kaei-kaei ba ym lah ban ïa batai lypa. Ki jingkylla ki wan ha ki khyllipmat bym poi pyrkhat. Naduh mynnor haduh mynta, ka saiñpyrthei ha Meghalaya ka ju kylla. Kitei ki MLA ki la kam ba ka jingwan pynïasoh sha ka BJP ka long namar ka dawbah jong ka jaidbynriew kum ka jingpynrung ïa ka ktien Khasi ha ka Khyrnit kaba Phra ka riti synshar ka ri, ban pyllait ka tih dewïong, ban pynlong aiñ ïa ka MRSSA bad kiwei kiwei ki mat kaba ki la buh hakhmat ka BJP bad ruh ka roi ka par jong ki konstitwensi. Kane ka pyni biang sa shisien ba lehse ka don ka jingleh shiliang khmat na ka liang ka Sorkar ïa ki MLA ki bym dei na ka NPP namar ki pynpaw ïa ka jingbym don ka roi ka par ha ki konstitwensi ki jong ki. Nangne shakhmat, ngin ïa peit thuh kumno ka Sorkar MDA-II hapoh ka jingïalam ka NPP kan synshar. Ka jingsynshar ka lah ban nang bha lane ka lah ban nang sniew.
