Shillong, Risaw 15
Kum shi bynta jong ka jingpynkhreh ka jylla Meghalaya ban pynlong ïa ka 39th National Games ha ka sien kaba nyngkong, ka Indian Olympic Association (IOA) ka la thaw ïa ka Games Technical Conduct Commit-tee (GTCC) kaba don san ngut ki dkhot ki ban khmih bad ban pynïaid beit ïa kane ka lympung ïalehkai kaba heh jong ka ri ka ban long ha u snem 2027.
Ïa ka jingthaw ïa ka komiti la ai jingpyntip sha u Chief Secretary ka Jylla katkum ki kyndon jong ka jingïateh jong ka Jylla ba pynlong ïa ka jingïalehkai, da kaba buh ïa ki riew shemphang jong ka jingpynkhreh na ka bynta katei ka lympung.
Ïa kane ka komiti yn pynïaid da ka Sunaina Kumari, ryngkat u Ravinder Choudhary, Maninder Pal Singh, V. Sunil Kumar bad u Dushyant Sharma, SSP-JKP kin long ki dkhot. Ki jingkitkhlieh jong ki kan kynthup ïa ki jingdonkam bapher bapher ha ka jingtreikam bad ka jingïalehkai ki ban ïaid beit ïaid ryntih ha ki jaka jong ka Jylla kiba pynlong ïa kane ka lympung.
Napdeng ki kam ba kongsan jong ka kan long ka jingpynkhreh ïa ki por ïalehkai, ka jingpeit bniah ïa ki jingïashim bynta ha ki jingïalehkai, ka jingpynbeit ïa ki kyndon naka bynta ki jingïalehkai bad ka jingpynshisha ïa ki jingtip ba bniah na ka bynta ki jait jingïalehkai bapher bapher. Kane ka komiti kan peit ruh ïa ki kam kiba ïadei bad ka jingthied ïa ki tiar ïalehkai bad ka jingpynkhreh ïa ki jaka ban pynbiang ïa ki jingdonkam jong ki jingïalehkai.
Ka jingïatreilang bad ki synjuk ïalehkai jong ka ri (National Sports Federations) bad ka Meghalaya National Games Secretariat kan long sa kawei pat ka bynta kaba kongsan jong ka kam ha ka komiti, khamtam ha kaba pynbeit ïa ki jingeh ba ïadei bad ka jingstad bad ban pynthikna ba ki jingpynbeit ïa ki jingïalehkai kin ïaid katkum ki kyndon ba la buh.
Na ka bynta ka Meghalaya, ka ban pynlong ïa ka 30th National Games ka dei ka kabu kaba khraw ban kyntiew ïa ki jingïalehkai bad ban pynïoh ïa ki jaka ïalehkai kiba paka. La khmih lynti baroh kiei kiei kin long kiba biang na ka bynta katei ka lympung naduh ki jaka ïalehkai bad kiwei ki jingdonkam.
Kumba ka long mynta ka Sorkar Jylla ka la pyrshang katba lah ban pynbiang naduh ki jaka ïalehkai bad baroh ki jingdonkam kiba long shi bynta jong katei ka jingpynkhreh. Kine ki kynthup ïa ki projek ha JN Stadium ha Shillong, ka jingpynbha ïa ki jaka ïalehkai ha Tura bad ka jingpynheh ïa ki jaka sah jong ki nongïalehkai.
