Jerusalem, Risaw:
U Myntri Rangbahduh ka Israel, u Benjamin Netanyahu ha ka Sngi Balang, u la ong ba um shym don jingthmu eiei ban leit hiar thma pyrshah ïa ka Iran ha shwa jong ka ilekshon ha Israel ka ban long ha ka 27 tarik u Risaw hynrei u la maham ruh ïa ka Iran bad ki jingthmu buit poh jongka, ba kim dei ban hiar thma ïa ka Israel.
“Kam long kaba suk ïa ngi, kam long kaba bha”, la ong u Netanyahu ha ka jingiakren ha ka Army Radio jong ka Israel, haba la kylli ïa u shaphang ka jinglah ban don ka jingiakhih lypa bad ki jingkynnoh jong ki nongialeh pyrshah jong u ha ka sain pyrthei ba u wad ïa ka jingiakhun shipai ha shwa ka elekshon.
“Wat lada ka Iran kan siat missile ïa ngi kin kynnoh ïa nga”, la ong u Netanyahu, watla u la pynkynmaw biang ruh ïa ki jingmaham ba mynshwa jong u ïa ka Iran, da kaba ong ba ka Israel kan jubab da ka bor lada shah thombor.
Um shym la batai bniah halor ka jinglah ban don ka jingïakhih lypa hadien ka elekshon lane shaphang ki jingïakren jong u dang shen bad ka Washington shaphang ka Iran.
Ka United States bad ka Iran ki la ialeh thma naduh ka 28 tarik u Rymphang ha kaba ka US bad ka Israel ki la hiar thma ïa ka Iran bad ka Tehran ka la jubab da ki jinghiar thma la jong ïa ki Israel bad ki Gulf states. Ka Israel bad ka Iran kim ju ïa khaii ding naduh u Jylliew.
Haba la kylli hato ka Israel ka ïarap ne em ïa ka Saudi Arabia pyrshah ïa ki jinghiar thma jong ki kynhun lehnoh Yemeni Houthis kiba ïasoh bad ka Iran, u Netanyahu u la ong.
“Ngam ju rung sha kita ki mat. Nga lah ban ong tang ïa phi ba bun ki ri ha Middle East ki phai sha ngi hadien ka jingjop kaba khraw bad ki jingjop kiba khraw jong ngi.”
Ka Saudi Arabia, ka la mad ïa ki jinghiar thma jong ki Houthi kiba la nang jur ha kine ki taiew ba la dep, kynthup ïa ka jinghiar thma ha ka kad liengsuiñ ha Riyadh, ha ka sngi Saitjaiñ, ha kaba 13 ngut ki briew ki la ïap.
U Netanyahu, u ong ba ki proxy jong ka Iran, ki dang wad ruh ban thombor ïa ka Israel, ha shwa ka elekshon.
U myntri kam pohiing ka ri, u Israel Katz, haba kren na ka jaka ba la pynbna hi kum ka jaka iada kaba ki shipai Israel ki bat ha ka thain shatei jong ka Lebanon, u la maham ïa ka kynhun Hezbollah jong ka Lebanon, kaba la kyrshan da ka Iran, ba kin nym thombor ïa ka Israel.
“Ka Hezbollah kan mad ïa ka jingshah pynshitom kaba jur bad kan duh noh ïa kiwei pat ki jaka ha ka thaiñ shatei jong ka Lebanon hapoh ki thaiñ Nabatieh bad Litani, ki ban sa long shi bynta jong ka jaka pahara ba neh jong ka Israel.
U Katz u la ong ba shi million ngut ki Shi’ite kin shah pynkynriah jaka bad ba ka kut baskhem jong ka Hezbollah ha Beirut kan nym lait.
Ka Israel, ka la pynlong ïa ki jinghiar thma na suiñ bad ka jinghiar thma na khyndew, ha ki bynta ba shathie jong ka Lebanon, mynta u snem, ha ryngkat ka jingïahap bad ka thma ha Iran, hadien ba ka Hezbollah, ka la siat ïa ka Israel, kum ka jingsiew kylliang, na ka bynta ki jinghiar thma pyrshah ïa ka Tehran.
Da ki spah hajar ngut ki briew na ka jaidbynriew Shi’ite Muslim jong ka Lebanon, na kaba ka Hezbollah ka ioh jingkyrshan, ki la shah pynpra noh ha katei ka jingialeh.
