Shillong, Risaw 15
Ka East Khasi Hills District Chess Association (EKHDCA) ka la ïoh ban jied ïa ki 12 ngut ki nongïalehkai kiba kynsai ki ban leit shim bynta sha ka “49th Meghalaya State FIDE Rating Chess Championship 2026” ka ban long ha Nongstoiñ naduh 22 haduh 24 tarik mynta u bnai Risaw.
Kine ki long u Anubhav Sharma, Samik Sinha, Banrijohn Mukhim, Jeveswar B. Marak, Sebastian Kurbah, Gipolson Pahsyntiew, Randolph Peter Pariat, Eddyson Kurbah, Amit Saraf, Richard Blah, Sagnik Kandar bad Sanlanghame S. Pyrtuh.
Kane ka la wan hadien ba ki la lah ban pynpaw ïa ka jingtbit ha ka lympung ïalehkai 8th East Khasi Hills District Chess Championship 2026, kaba la poi sha kaba kut ha ka sngi Palei ha Khasi National Dorbar Hall, Mawkhar, Shillong.
Ïa ka nam Best Veteran la khur da u Bah Jefferson V Lyngdoh, Best Female sha ka Badashembha Tangsang, Best Under-10 sha u Tokermame S. Pyrtuh, Best Under-13 sha u William Jangminthang, Best Under-15 sha u Mebaailang Nongkynrih, Best Under-17 sha u Radha Ranjan Chakravarty bad Best Under-19 sha u Mewanpynhunlang Diengdoh.
Ki la don 87 ngut ki nongïalehkai shynrang bad kynthei ki ban wan shim bynta naduh kiba dangkhynnah, ki samla wat haduh kiba la rangbah. Kine ki kynthup lang ruh ïa 21 ngut ki ‘FIDE Rated Chess Player’.
Ïa ki khusnam sha ki nongjop la sam da u Colonel Vishal Madhok, Commandant ka 2 Meghalaya Bn., NCC Cadet kum u kongsan ha kaba la ïadon lang ki dkhot ka EKHDCA.
