Shillong, Risaw 15
Ka nongbah Shillong kan pynlong ïa ka lympung ïalehkai karate ba la tip kum ka 5th KIO North East Zone Karate Championship 2026, ha kaba yn sdang naduh 22 haduh 24 tarik mynta u bnai.
Ïa kane ka lympung yn pynlong da ka Karate India Organisation (KIO) ryngkat ka All Meghalaya Karate-Do Association (AMKA) bad yn kyrshan lang da ka tnat ïalehkai ka Sorkar Jylla. Ïa kane ka lympung ka ban neh lai sngi kynthih, yn pynlong ha Convocation Hall jong ka North-Eastern Hill University (NEHU) Shillong.
Kane ka jingïakob ba paw kan pynïasoh lang ïa ki nongïalehkai karateka na kylleng ka thaiñ shatei lammihngi jong ka ri India, kaba ai ka lad ba kin pyni ïa ki sap ïalehkai ha ka karate.
Te kumta la khmih lynti ba ha kane ka lympung kin wan shim bynta da 899 ngut ki nongïalehkai, ki coach, ki rephri bad ki dkhot jong ki synjuk ïalehkai ka thaiñ shatei lammihngi.
Kane ka jingïakob ka thmu ban kyntiew bad pynkhlaiñ ïa ka jingïalehkai karate ha ka thaiñ shatei lammihngi, ban pynshlur ïa ka jingtbit ha ka jingïalehkai hapdeng ki samla ïalehkai. Kan long ruh kum ka lad kaba kongsan na ka bynta ki nongïalehkai ban bishar bniah ïa ka jinglah jong ki bad ban pynkhreh na ka bynta ki jingïalehkai kiba kham heh, kum ka 39th National Games, kaba ha ka jylla Meghalaya ha u snem ban wan.
Kumba ka paw ki nongïalehkai karate hapoh ka lama jong ka AMKA ki la wanrah nam bad burom ïa ka Jylla ha kiba bun ki lympung jong ka thaiñ shatei lammihngi, ha ka ri (national) bad wat shabar ri ruh kumjuh. Te kumta la khmih lynti ba ki nongïalehkai ka Jylla kin ïalehkai bha ha katei ka lympung ka ban long ha ka taïew ban wan ha ryngkat ka jingkyrshan lang ki kmie ki kpa, kiba haïing hasem bad kiwei.
