Shillong, Risaw 15
Ki rynsan iakura jong ka State Sub Junior Boy’s & Girls U-15 Years Boxing Championship ba la pynïaid da ka Meghalaya Boxing Association (MBA) ka la nangjam shaphrang ha ka sngi kaba ar ha madan ïalehkai basketball jong ka Raid Laban College, ha Madan Laban, Shillong.
Ïa kane ka jingïakob kaba lai sngi la sdang ha ka sngi Balang bad yn pynkut ha ka sngi Thohdieng.
Ha kaba ïadei bad ki nongjop ha ki jingïakhun semi final ha ka sngi Palei ha ka kyrdan ïakhun jong ka 30-33 kg u Daniel Nongrum bad u Safal Thapa ki la jam sha ka phainal hadien ba ki la pynliem noh ïa u Dame Syiemlieh bad u Inam Vianney Nongkhlaw. Ha ka kyrdan ïakhun kaba 38-40kg u Bantei Rani bad Steven Khyllep ki la jam sha ka phainal hadien ba ki la jop ïa u Milando bad u Reform Talang.
Katba ha ka jingïakhun jong ka 40-42kg u Ethan Nongdhar bad u Banlang Lyngdoh, ki la jam shakhmat hadien ba ki la pynliem noh ïa u Omega Nongjri bad u Jakrikra R, Mrak. Ha ka kyrdan ïakhun kaba 44-46 kg pat, ki rangïakura ba la lah ban buh jaka ïalade sha ka phainal ki long u Debraj Thapa bad u Shandor Kharchandi hadien ba ki la lah ban pynliem noh ïa u Chara Dechao R Marak bad u Tangrik.
Ha ka kyrdan ïakhun kaba 46-48kg pat u Florian Kharjana bad Irfan Nongrang ki la jam sha ka phainal hadien ba ki la pynliem noh ïa u Kabibath bad u Denzil Myrthong.
Haba phai pat sha ka kyrdan ïakhun kiba 48-50kg, u Samha O Mulieh bad u Ariri Ch Momin ki la jam sha ka phainal hadien ba ki la pynliem noh ïa u Rohan Kumar Ray bad u Bamekordor Majaw, katba u Rudolf Lyngdoh bad Damebala-ai Janai Ksiang ki la jam sha ka phainal hdien ba ki la jop ïa u Arnav Rai bad u Chiangrik, ha ka kyrdan ïakhun kaba 54-57kg
Haba phai pat sha ka jingïakhun ki kynthei ha ka kyrdan kaba 42-46 kg, ka Tariasa Marak ka la jam sha ka phainal da ka jingjop ïa ka Samki Phawa.
Kumban shu pynkynmaw ba ka jingpynlong ïa kane ka rynsan ïakura ka long kum shi bynta ka thong jong ka MBA ba kan lah ban lap bad shem ïa ki sap ïalehkai ba nylla ki khynnah shynrang bad kynthei, ki ban bteng ban long ki lawei jong ka jingïalehkai boxing ha kane ka Jylla.
Ha kane ka rynsan ïakhun ki klob kiba la mih shakhmat ban sei madan ïa la ki nongïalehkai ki long ka Green Heart Boxing Club, Rising Star Boxing Association, Noble Art Boxing Club, Mawshbuit Boxing Club, Upper Shillong Boxing Association. Bad na ka liang ki district pat kiba la wan ïashim bynta ki long ka Boxing Association of East Khasi Hills, West Jaiñtia Hills Boxing Association, Eastern West Khasi Hills District, Ri-Bhoi, West Garo Hills, North Garo Hills bad ka East Garo Hills.
