Patna, Risaw:
Ka kynhun Myntri jong ka Bihar ha ka lah sngi U Blei ka la mynjur ïa ka jingtyrwa ban pynbha ïa ka jingpynïasoh bad ki rukom treikam ki liengsuiñ.
Hapoh kane ka jingthmu, yn pyntreikam san tylli ki kad liengsuiñ thymmai bad khyndai tylli ki jaka hiar Helicopter ban sa pyntreikam ha kylleng ka jylla.
Ki distrik ha kaba yn shna ïa ki kad liengsuiñ thymmai ki kynthup ïa ka Kishanganj, Saran, Begusarai, Araria bad Gopalganj. Yn shna 9 tylli ki kad liengsuin ha Aurangabad, Banka, Jamui, Katihar, Khagaria, Nawada, Sheikhpura bad ha Sitamarhi.
Ka sorkar jylla kan kit 25 percent na ka jinglut baroh bad kan pynlut Rs. 10 lak shisnem halor ka jingpynbna paidbah ha ka por ba pyntreikam ïa ki liengsuiñ.
Ka sorkar kan pynthikna ïa ki lad ban leit shim bad pynhap sha ki sor ba marjan na ki kad liengsuiñ bad ki kad liengsuiñ khlem jingsiew.
Nalor kata, ka sorkar kan ai ruh ïa ki jingpynlait ha ka khajna bad kan pynïar ïa ka jingkyrshan pisa sha ki tnad treikam. Kane kan ïarap ïa ka sorkar ban pynbiang ïa ka jingpynpoi ïa ki jingshakri jong ki liengsuiñ kaba kham bha sha ki sor bad ki nongbah.
Ïa ki kad liengsuiñ bad ki heliport ba la tyrwa yn shna ha ka rukom PPP.
Ka kynhun Myntri ka la mynjur ruh ban tei ïa ka Five-Star Hotel ha Vaishali, ka jaka jngohkai kaba pawnam.
Ka tnad jngohkai pyrthei jong ka jylla ka la dep pynkylla ïa ka rai kaba kham mynshwa ban pynsted ïa ka jingtei ïa kane ka hotel.
Kane ka projek kan treikam hapoh ka PPP mode. Kham mynshwa, la rai ban tei ïa katei ka Resort ha ka jaka kaba heh 5 akar, hynrei la pynheh ïa katei ka jaka sha ka 10 akar. Nalor kane, yn sa pyntreikam ruh ïa ka Tech Park ha ka thaiñ Gardanibagh ha Patna, kaban ai kam ai jam ïa ki 5,000 ngut ki briew.
U Myntri Rangbah ka Bihar, u Samrat Choudhary, ha ka jingkren jong u hadien ba la dep ka kynhun Myntri, u la ong ba yn pynlong ïa ka Bihar kum ka pdeng jong ka jingseng kam seng jam, ka ïoh kam ïoh jam bad ka jingpynmih thymmai hapoh ka sorkar NDA ba ïalam da ka BJP ha kane ka jylla. “Ka Bihar kan noh synñiang ruh ban tei ïa ka India kaba la roi ha u snem 2047”, u la bynrap.
U Choudhary u la ong ba yn pyrshang katba lah ban pynlong ïa ka Bihar kum ka jaka ba kongsan jong ka jingbei tyngka, ka jingai kam bad ka jingseng kam seng jam.
Haba pynpaw ïa ka jingnoh synñiang jong u Myntri Rangbahduh ka ri u Narendra Modi, u Choudhary u la ong ba ka Bihar ka la kiew bha hapoh ka jingïalam jong u Myntri Rangbahduh u Narendra Modi.
“Ka jingkular jong u Modi ban pynthikna ba ki jingmyntoi jong ka roi ka par kin poi sha ki briew kiba shah iehnoh beiñ ha ka imlang sahlang ka long kum ka jingai mynsiem ïa ngi baroh,” u la ong.
Ha ka jingïaid lynti jong u kaba 25 snem naduh u Myntri Rangbah jong ka Gujarat shaduh u Myntri Rangbahduh ka ri, ki jinglong jingman ki la ïai kylla, hynrei ka jingmut ‘ka jaitbynriew nyngkong, u nongshong shnong nyngkong’ kam shym la kylla na ka bynta u Myntri Rangbahduh, ong u Choudhary, da kaba bynrap ba ka jingpynbeit ïa ki jingeh jong ki briew ka la long ka jingthmu ba kongsan tam na ka bynta u Myntri Rangbahduh.
U la ai khublei ïa u Modi uba la pyni ïa ka jingsngewtynnat kaba khraw ïa ka roi ka par jong ka Bihar.
La ka long ka jingshna ïa ki ïing Pucca, ki jaka leit bar, ki surok bad ki jingkieng, ne ka jingpynbiang ïa ki tyndong LPG bad ka bording sha ki briew kiba duk, u Modi u la trei khlem sangeh ban shakri ïa ki paidbah, u la bynrap.
