Shillong, Risaw 15
Ka Meghalaya Paralympic Association (MPA) ka la ai khulei kitbok ïa u rangïalehkai phutbol uba duna ha ka bor ïohi, u Klingson D. Marak, uba long tang marwei na ka Jylla ban mihkhmat ïa ka ri India ha ka 5th Asian Para Games ka ban long ha Aichi-Nagoya, Japan naduh 18 haduh 24 tarik u Risaw mynta u snem.
U General Secretary katei ka synjuk u Bah Joannes JTL Lamare u la pynpaw ka jingsngewkmen ba ka Jylla ka la lah ban sei ïa uwei na ki rangïalehkai u ban mihkhmat ha ka jingïalehkai phutbol. Te kumta ka synjuk ka la ai khublei kitbok ïa une u rangïalehkai ba un lah ban pynpaw ïa ka sap ïalehkai jong ka jong u khnang ban wanrah nam bad burom ïa ka ri India hi baroh kawei.
Kumba ka paw ka thain shatei lammihngi ka la lah ban pynmih ar ngut ki rangïalehkai ki ban leit shim bynta sha katei ka lympung ha kaba uwei pat u dei na ka jylla Arunachal Pradesh.
Te kumta ha katei ka lympung, ka kynhun ïalehkai phutbol ka India kan sdang ïa ka jingïaleh -kai kaba nyngkong pyrshah ïa ka South Korea ha ka 16 tarik u risaw, ha kaba yn bud sa ka jingïakhun pyrshah ïa ka Japan ha ka 17 tarik, Thailand ha ka 19 tarik, Iran ha ka 20 tarik bad ïa ka China ha ka 21 tarik.
Ha lyndet ka jingshah jied utei u rangïalehkai, ka dei hadien ba ka Megha -laya Blind Football Asso-ciation (MBFA) ka la phah ïa ki nongïalehkai ki ban leit shim bynta ha ka jingpyrshang ha ka nongbah Delhi naduh 25 haduh 28 tarik u Jymmang mynta u snem. Te kumta na ka liang ka Indian Blind Football Federation ka la pyllait ïa ka thup kyrteng jong ki nongïalehkai ka Jylla, kiba kynthup ïa u Klingson, Prakash D Shira, Johnborlang Pyng-rope lem bad u rangapkol u Visiondo M Sangma. Hynrei tang u Klingson uba la shah jied ban mihkhmat ïa ka kynhun ïalehkai phutbol ka ri India sha katei ka lympung ka ban long ha Japan.
