Shillong, Risaw 15
Ka lympung ïalehkai Mawpoiñ ba la tip kum ka 1st Open Inter School & Inter College Mawpoiñ, ba la pynlong da ka Seng Samla Seng Khasi Kmie ka la poi sha kaba kut ha ka 15 tarik u Risaw ha Madan Heh Mini Stadium, Mawlai Phudmuri.
Ha ka jingïakhun final na ka bynta ki skul ha ka liang ki shynrang, la rah da ka Seng Khasi Riwar Mihngi HSS, Pynursla hadien ba ka la lah ban pynliem ïa ka Seng Khasi Hr S.S, Jaïaw, katba na ka liang ki kynthei la rah da ka Seng Khasi SS Umkseh Tyrsad, kaba la jop ïa ka Seng Khasi HSS, Shillong.
Haba phai pat sha ka jingïakhun na ka bynta ki kolej ha ka liang ki kynthei la rah da ka Synod College hadien ba ka la pynliem noh ïa ka Ri War College, Pynursla, katba ha ka shynrang la rah nam lahduh da ka Seng Khasi College, kaba la jop ïa ka UCC College.
Ïa ki khusnam la sam da u Deputy Commissioner ka East Khasi Hills District u Abhilash Baranwal kum u kongsan ha kaba la ïadon lang u President ka Seng Khasi Kmie Rgh O. Pyngrope, bad kumjuh ki dkhot ka JPK bad Seng Kynthei.
