Pynbna jingïarap pisa ka Maharashtra sha ki nongrep ba shah ktah jur

Mumbai, Risaw:

Ka sorkar Maharashtra, ha ki khyndiat sngi jong ka taïew ba la lah, ka la pynbna ba kan ai T.5,000, kum ka jingai sngewbha ha ka Diwali, sha ki nongrep, kiba la shah ktah ha ka nemsniew. Ïa kane ka pisa yn thep ha ka bank account jong uwei pa uwei u nongrep shwa ka tamasa Diwali.

Ka jylla Maharashtra ka ïa kynduh ïa ka jingrang tyrkhong kaba jur namar ka jingduna slap. Ka sorkar Maharashtra ka la pynbna ba 85 percent na ka thaiñ jong ka jylla ka dei kaba la shah ktah ha ka jingkyrduh um.

Ka kynhun myntri jong ka jylla ha ka sngi Balang jong ka taïew ba la lah, ka la pynrung sa 40 tylli ki Taluka ha ka thup jong ki Taluka kiba la shah ktah ha ka jingkyrduh um, katba 265 tylli ki Taluka la pynbna kham mynshwa ba ki shah ktah ha ka jingkyrduh um. Kumta, na ki 358 tylli ki taluka, 305 tylli la pynbna ba ki shah ktah ha ka jingkyrduh um, bad la pynjlan sha ki ïa ki 12 tylli ki jingmyntoi jong ka sorkar jylla, kum ka jingpynlait na ka bai pule jong ki samla pule, ka jingpynbiang ïa ki jingbam, bad ki jaka tan um dih.

U Myntri Rangbah ka jylla, u Devendra Fadnavis, u la ong ba, katkum ki jingthoh ba la dep, la ju pynbna ïa ka jingkyrduh um ha u bnai Nohprah, hynrei ka sorkar jong u, ka la pynbna kloi, da kaba peit ïa ka jinglong jingman kaba shyrkhei ha ka jaka.

U la ong ba namar ba ki la pynbna lypa ïa ka jingkyrduh, yn sa ai jingïarap kham kloi.