Bengaluru, Risaw:
U Myntri ka sorkar pdeng u HD Kumaraswamy ha ka sngi Palei u la tuklar ïa u Priyanka Kharge, Myntri ka tnat ki kam pohïing jong ka jylla Karnataka, ba un bthah ban pynlong ïa ka jingtohkit ba la ïalam da u nongbishar, halor ka jingïakynad kaba la mih na ki kam ïasuhbuit na ka video bad u la kob ïa u ban kem ïa u.
Haba kynnoh ïa u Kharge ba u dei uba khawpud, u Kumaraswamy u la ong, “Ngam pynleit jingmut ha ki kam khawpud kum ma u. Nga kren da ka jingshlur. Ka jingïakhun ka la sdang.”
U Kumaraswamy u la pyllait paidbah ïa ki dur ba la kynnoh ba ki pyni ïa u Prashanth ryngkat bad u General Secretary ka AICC u Randeep Singh Surjewala bad u Rakesh Shetty ha kaba ïadei bad ka jingïakajia kaba dang ïai bteng halor ka video sting operation. U Kumaraswamy, u la kynnoh ba u Prashanth, uba la ïohi ha katei ka kam ïasuhbuit, u dei u nongthombor bad u la dawa ban kem mardor ïa u.
U Myntri ka sorkar pdeng u la hiar sha ka ophis treikam jong u Police Commissioner jong ka Bengaluru ban pyrshah ïa ka jingshah kem jong ki nongbud jong ka seng jong u ha kaba ïadei bad ka jingsaphriang ka video. U la buh jingkylli ïa ka jingleh jong ki pulit bad u la dawa ba dei ban kylli jingkylli ïa u ha ka jaka jong u.
“Ki nongbud jong ka seng jong ngi kim shym la pynleit jingmut ha kum kine ki kam. Balei phi kem ïa ki? Kylli beit ïa nga. Dei na kata ka daw ba nga wan sha ophis jong u Commissioner,” u la ong. Lah ban kdew ba un shong da ka jingïakhih ha ophis treikam u Police Commissioner.
