Mumbai, Risaw:
Kumba la pynbeit, la ong ba hashwa ka Diwali, ka Bombay High Court ha ka sngi Palei ka la pynshai ba ka hukum jong ka kaba khang ban pynbthei ïa ki bom pataka ha ki surok paidbah bad ki surok kan dang treikam baroh shisnem bad kan treikam ha baroh ki tamasa.
Ka kynhun nongbishar ka G S Kulkarni bad ka Neela Gokhale ki la ïohi ba ki bom pataka ki wanrah ïa ka jingjaboh basniew bad kaba ktah jur, kaba ktah ïa baroh, khamtam ïa ki khynnah bad ki riew rangbah. Ka la kdew ruh ba ka jingjaboh ka lyer ka kiew hadien ka Diwali.
Ha ka por jong ka jinglehniam Ganesh Chaturthi ha u bnai ba la dep, ka ïingbishar ka la khang syndon ïa ka jingpynbthei bom pataka ha ki surok paidbah, da kaba ai daw ba ka jingjaboh ka lyer bad ka jingsawa. Ka la shim khia bha ïa ka jingpynjakhlia ïa ka jingsawa ha ki por lehkmen.
Ha ka sngi Palei, ka kynhun nongbishar ka la pynpaw ïa ka jingsngewkhia halor ka jingbym lah ban tehlakam jong ka sorkar bad kiwei kiwei ki bor halor ka jingbthei jong ki bom pataka.
“Ka don ka jinglong jingman kaba khlem aiñ. Baroh ngi shah teh ha ka Riti synshar, bad ka hok jong ki nongshong shnong ka long kaba kongsan tam. Ka jingeh ka dei ka jingbym bud ïa ka aiñ”, la ong ka kashari.
Ka ïingbishar ka la bthah ïa ka Brihanmumbai Municipal Corporation (BMC) bad ka Maharashtra Pollution Control Board (MPCB) ba kin pynmih ïa ki jingpynbna kiba pynshai ba yn ym shah ban pynbthei bom ha ki jaka paidbah, kynthup ha ki surok, ki lane bad ki lynti ïaid kjat.
Ka kashari ka la khot ruh ïa ki bor pynïaid ban pynlong ïa ki jingpynsngewthuh paidbah ban pynsngewthuh ïa ki nongshong shnong shaphang ka jingma kaba mih na ka jingjaboh ba shyrkhei kaba mih na ki jingpynbthei bom pataka.
