Hadien ka jingkhlad noh jong u MP ka Shillong Parliamentary Konstitwensi u Dr. Ricky AJ Syngkon, ka Election Commission jong ka Ri India (ECI) kan hap ban pynlong ïa ka ilekshon shiteng samoi na kane ka konstitwensi khnang ba ki paidbah kin ïohlad ban jied ïa u MP bathymmai ha ka jaka jong u Dr. Ricky. Ha ka ilekshon MP ha u snem 2024, u Dr. Ricky na ka VPP u la khur ïa ka jingjop kaba heh bad jop da palat 3 lak 70 hajar tam ki vote ïa u kyrtong ka Congress Bah Vincent H Pala uba la wan ba-ar. Ha kane ka kynti, ka jingtynjuh kan nym long shuh tang ïa ka Congress ne NPP kaba ïalam ïa ka Sorkar Jylla hynrei kumjuh ruh ïa ka UDP bad ka BJP la kine ki seng saiñpyrthei kin lah khie khlieh biang ne em.
Hadien ka jingshah rem kput ha ka ilekshon MP ha u Dr. Ricky Syngkon, mynta ka kynti ka Congress kaba la pynïeng biang da u Bah Vincent H Pala, ka NPP ka la sei da u Dr. DRL Nonglait bad ka UDP da u Bah VGK Kynta ban ïakhun ïa ka ilekshon shiteng samoi bad kan long ka jingtynjuh ka bakhraw ïa ka Congress, NPP bad UDP ynnai da ïakren than ïa ka BJP, watla ka la ïoh mynta haduh 10 ngut ki MLA. Ngi ïohi ba ka jinghiar ban ïalap bad pynshai ïa ki nongrim treikam bad ban pynpaw ïa kaei kaba ki la trei bad leh, ka la ïaid shaid shaid hapdeng ka NPP bad ka VPP, watla na ka liang jong ka ECI haduh mynta kam pat pynbna satia ïa ka tarik ban pynlong ïa ka ilekshon. Watla ka VPP, NPP, Congress bad ka UDP ki la dep ban pynbna ïa la ki kyrtong hynrei kaba sah mynta ka dei sa tang ka BJP ka bym pat pynbna satia, watla ka la pynthikna ba kan sei ïa u kyrtong.
Ha ka ilekshon MP kaba la dep, ka la long shisha ka jingjop kput jong ka VPP, ha kaba u Dr. Ricky Syngkon u la jop ha ki 32 na ki 36 tylli ki konstitwensi Assembly, kaba la pyni ïa ka jingkhlaiñ bad khie rasong jong ka VPP, kaba la khur jingjop tang ha ki 4 tylli ki konstitwensi ha ka ilekshon MLA ha u snem 2023. Hynrei ka jingai rai jong ki paidbah ha ka ilekshon MP, ka la kyntiew hi war ïa ka VPP ban pynlong syndon kum kawei na ki seng riewlum kaba khlaiñ watla ka dang dei ka seng kaba dang thymmai. Nangne, ngi sngewthuh ba kan ym long kaba suk ïa kiwei pat ki seng ban ïakhun ha kane ka ilekshon MP shiteng samoi khamtam lei haba ki paidbah ki la ai ka jingieid bad jingkyrshan kaba pura ïa ka VPP. Ka long kaba shai ba ka VPP kan hap ban ïakhun tyngeh ban pynjop biang sa shisien ïa la u kyrtong ha kane ka ilekshon shiteng samoi. Watla ka NPP ka la trei shitom ban hiar kylleng ki jaka ban pan jingkyrshan na ka bynta ban pynjop ïa u Dr. DRL Nonglait hynrei ka la hap ban sngewthuh ba kam lah ban shu kheiñ sting ïa ki paidbah nongthep ‘vote’. Ki ju ong ba barabor, ki paidbah ki kham stad ban ïa ki kyrtong ha ki ilekshon. Kane ka long kaba shisha haba ngi peit na ka jingmih na ka ilekshon MP Lok Sabha ha kylleng ka Ri. Namarkata, ban kheiñ dewthala ne kheiñ biej ïa ki paidbah ka long kaba bakla.
Ngin sa hap ban nang ïa peit bad khmih kaei ka ban jia ha kine ki khyndiat taïew bad bnai khamtam ynda ka ECI ka la pynbna ïa ka tarik jong ka ilekshon MP shiteng samoi. Hynrei naduh mynta ngi la sngewthuh shai ba kan ym da dei eh ka jingïakhun kaba eh ïa ka VPP namar ki paidbah ki dang shu dep pynjop kput ïa ka. Haba phai pat sha ka NPP, ba lada kato ka mynsiem isih NPP ka ïai neh haduh ban da poi ka ilekshon shiteng samoi, ka NPP kan ïakynduh mawsiang. Tangba ka shong pat ha ki nongïalam jong ka seng kumno kin treikam nangne shakhmat. Ki paidbah ka Rilum Khasi Jaiñtia hadien ba ki la pynjop donburom ïa ka VPP ha ka ilekshon MP 2024, ngi la sakhi biang ba ha ka ilekshon sha KHADC bad JHADC ruh ki paidbah ki la pynïoh ka jingjop kaba heh ïa ka VPP, ha kaba ka la ïoh thaw EC syndon marwei ha KHADC, katba ha JHADC pat ka la wan ba-ar bad hap shong ha Liang Pyrshah.
