Agartala, Risaw:
U Myntri Rangbah ka jylla u Manik Saha u la pynbna ba ka sorkar jong u kumba ka la thmu ka la ïaid shakhmat ban pynkhlaiñ ha ka jingpynlong ïa ka jingpynthymmai ïa ki tiar bad ki rukom pyntreikam jong ki pulit ka Tripura lyngba ka AI.
U la pyntip ba ka sorkar jylla ka thmu ban wanrah ïa ki kor ki bor kiba kham thymmai kum ki kamra pynïaid ba pyndonkam da ka AI, ki Drone, ki smart CCTV, bad ki System ba la pynbha ha ka kyrdan jong ki distrik bad ki jylla.
U Myntri Rangbah ka jylla u la pynpaw ka jingsngewnguh ïa ki Bank kiba la kyrshan ïa ki bahaïing hasem jong ki pulit kiba la aiti ïa la ka jong ka jingim ha ka jingshakri bad u la pynpaw biang ïa ka jingangnud jong ka sorkar na ka bynta ka jingbha jingmiat jong ki paidbah bad ki pulit.
Haba pynpaw ïa ki jingjop jong ka jylla ha kaba pynneh pynsah ïa ka shongsuk shongsaiñ, u Saha u la ïasam ba ki kam runar ha Tripura ki la hiar da 19.3% ha u snem 2024 haba ïanujor bad ki snem ba la leit, kaba long ka kam runar kaba duna tam ha ki shisnem.
U Myntri Rangbah u la ïaroh ruh ïa ki pulit bad ki shipai Tripura State Rifles (TSR) kiba la pynlong ïa palat 25 hajar tylli ki kam pynbha ïa ka imlang-sahlang ha ki lai snem ba la leit, kiba la ai jingmyntoi ïa palat san lak ngut ki nongshong shnong.
Haba batai ïa ki jingthmu ban pynthymmai, u Saha u la ong, “Ngi pynrung ïa ki kamra pynïaid ba la pynshong nongrim ha ka AI, ka Drone teknoloji, bad ki CCTV kiba khlaiñ bor ha baroh ar ki kyrdan jong ki distrik bad ki jylla.”
“Ka jaka treikam bathymmai jong ki pulit ka dang don hapdeng ka jingpyntreikam ban shna, bad ki jingpyntreikam ki dang ïaid shakhmat ban pynthymmai ïa ki jaka treikam jong ki pulit jong ka East bad West Agartala. U Myntri Rangbahduh ka ri u Narendra Modi u la banjur ruh ïa ka jingdonkam ban shna thymmai ïa ki jaka treikam jong ki pulit kiba la rim bad ki jaka sah briew, bad ngi kut jingmut ban pynurlong ïa kane ka jingthmu”, u la ong.
