Kane ka long kaba donkam tam ha ngi ki briew katba ngi dang im ei ha kane ka sla pyrthei. Kum ki briew ngi trei ngi ktah bad ngi im kamai ban ïoh ka bam ka sa hangne ha pyrthei. Ngi rep ngi riang ngi puh ngi daiñ ban ïoh im. Namar lada ngim rep ngim riang ngin sa ïap thngan kum ki briew kiba donkam ïa ka bam ka sa ha ka bynta ka jingim jongngi. Ka met jong ngi ki briew ka donkam ïa ka bam ban khlaiñ ban shait. Khlem ka bam ngi shu ïap ei khamakha tang ha ki khyndiat por. Namar u briew um lah ban im khlem ka bam. Ka bam ka donkam man ka sngi ban pynkhlaiñ bad ban tei ïa ka bor met bor phad. Kiwei kiwei ki kynja jingleh niam leh rukom kim da ai jingmyntoi ïa ngi. Ngi kñia ngi khriem katno katno ruh ym don jingmyntoi. Ngi duwai ngi phirat katno katno ruh kam don jingmyntoi. Ngi leit sha ki tamasa ruh ym don jingmyntoi. Ngi leit sha ki jingïaseng ruh ym don jingmyntoi. Ha ka jingim jongngi ki briew kaba donkam tam eh ka dei ka bam ban khlaiñ ban shait katba ngi dang im ei ha kane ka pyrthei shongbasa shipor. Kum ki briew ngi dei ban kamai ïa ka hok khlem da leh kino kino ki kam bym hok ha kane ka pyrthei. Ki tymmen ki ong, kamai ïa ka hok ym ba ngin thok ngin shukor ban ïoh ïa ka bam ha ka jingim. Kumta ka kam kamai kajih ka long kaba donkam bad don burom ha ka jingim jongngi hangne ha sla pyrthei.
C. B. Iawphniaw
