Shillong, Naiwieng 08
Ka Shillong Lajong FC bad ka Sohryngkham SC ki la khur jingjop ha ki jingïalehkai ba nyngkong jong ka Group-B ha ka lympung ïalehkai ka SSA Champions Cup 2026, ha ka sngi Saitjaiñ ha SSA Stadium, Polo.
Ha kane ka jingïakhun, ka Shillong Lajong ka la pynliem noh ïa ka Sanmer SC da 1-0 kol bad ka Sohryngkham ka la jop da 2-0 kol ïa ka Mawkhar SC.
Katei ka nam jop ka la wan urlong hashwa ban wai lyngba u Wilbert Marbaniang (90’+4) hadien ba kine ki kynhun kim shym la lah ban thep kol haduh kaba kut ki 90 minit.
Na ka liang ka Sanmer ka la rung sha kane ka jingïakhun ha kaba ka la shah tynjuh borbah ha ka Shillong Lajong, pynban ki rangïalehkai jong ka, ki la ïeng ïakhun tyngeh bad ïaleh katba lah ban ïeng ïada ïa la ka kut ïalehkai jong ka, kaba la buh jingeh ïa ka Lajong ba kan ïoh ïa ki kabu ki jong ka ban thep ïa ki kol,
Pynban ha ka khyllipmat ba ka jingïakhun ka khreh ban jam noh ha kaba kut, u Denzil Kharshandi u la trei shitom ban tehlakam ïa ka bol bad ha ka por kaba biang bha ba u la pashat sha u Wilbert, uba la lah ban pynurlong.
Hapdeng ka jingshah tynjuh, ka Sanmer ruh ka la pyrshang bad buit bad bor ha kaba ka la ïoh ruh ïa la ka kabu ksiar, hynrei ha kaba kut ka long ba khlem da lah ban pynphai.
Haba phai pat sah kawei ka jingïalehkai kaba ar, ki kol ba la thep da u Damanglangki Makdoh (18′) bad u Macheaveen Nongbri (57′) ki la biang pura ïa ka Sohryngkham ba kan pynliem noh ïa ka Mawkhar SC.
Ka jingjop ka Sohryngkham ha kane ka jingïakhun hi ka long ba naduh kaba sdang, ka la sei ïa ka buit ïalehkai kaba shyrkhei bha ka jong ka ha madan, kaba manla ka por haba ka ïoh ban rah shakhmat ikumba kan thep ïa ki kol.
Haba phai sha ka Mawkhar ruh ka la pyrshang ban ïa ryngkat ka buit ka bor ïalehkai jong ka, ha kaba u Donbok Sohtun u la ïoh ban pyndei da ka khlieh ïa ka bol, hynrei um shym la lah ban pynurlong haduh kaba kut ka jingïalehkai
Ka jingïalehkai jong ka Group-A mynta ka lah sngi U Blei kan long hapdeng ka Mawpdang ka lahduh jong ka 4th Division pyrshah ïa ka Mawpat kaba long ka lahduh jong ka 2nd Division ha ka por 2:30 nohphai sngi bad kane ka jingïakhun kan dei kaba nyngkong ïa ka Mawpdang, katba ka Mawpat kan dei kaba ar kaba wan hadien ba ka la pynliem ïa ka Nongkrem ha ka jingïakhun ba nyngkong jong ka.
