Cumilla, Naiwieng:
Ki bor pyniaid ka Bangladesh ki iathuh ba la lap pat ïa ka met jong u samla pule doktor, uba dang 26 snem ka rta na Jammu and Kashmir bad ïa ka met jong u la lap na kawei ka pung kaba don hapoh ka distrik Cumilla jong ka ri Bangladesh, ha ka step jong ka Sngi Balang, hadien ar sngi ba u la jah rngai na ka jaka pule jong u. La iathuh ba U Adnan Altaf, uba dei u samla pule jong ka Eastern Medical College ha Burichang upazila, ula jah rngai ha ka sngi Nyngkong, hadien ba ula mih na katei ka jaka pule ban leit bam ja miet ha kawei ka Restaurant Indian.
La iathuh ba ïa ka met jongu, la sei na kawei ka thliew um ha ka shnong Monipur, kaba don marjan bad katei ka kolej, kaba don hajan ka surok bah Dhaka-Chattogram. U Adnan u wan na Sopore kaba don ha ka thain shatei lam mihngi jong ka Kashmir. Ka jingkhlad noh jong u, ka la pynsngewsih ïa ka iing ka sem jong u, ha kaba kiba ha iing ha sem, mynta ki la kyrpad ïa ka sorkar India, ba kan tuklar bad iarap ban pynpoi ïa ka met jongu sha la iing.
Ka kmie jong U Adnan, kaba la leit synran ïa u sha Bangladesh ha ka por ba u wanphai sha kolej hadien ba u la shongthait, ka don mynta ha hospital ha katei ka Ri.
Katkum ka jingong jong kiba haïing jong u, ka don ha ka jinglong bym shngaiñ hadien ka jingïap jong u khun jong ka bad ka dang ïaleh ban ïakhun ïa ka jingduh.
Ki bor pyniaid jong ka kolej ki la iathuh ba u Adnan u la iakynduh jingeh ha ka bor pyrkhat bad ba ka kmie jong u ka la sah bad u ban peit ïa u.
