Shillong, Naiwieng 08
Ka ‘thei ïalehkai ka Jylla, ka Debasmita Dutta ka la shah jied ban shimti kum ka kapten na ka bynta ka kynhun ïalehkai ka North East ha ka Senior Women’s Inter-Zonal T20 Trophy 2026-27, ka ban ïalehkai naduh 24 tarik u mynta u bnai haduh 4 tarik u Nohprah ha Guwahati.
Ka Dutta ka la ïalehkai bha ha ka Senior Women’s T20 Trophy 2026-27 (plate group), ha kaba ka la khur lai tylli ki khusnam Player of the Match. Kawei pat ka ‘thei ïalehkai ka Jylla kiba la shah jied ha katei ka kynhun ka dei ka Neha Hajong, katba ka Luiza Tamang ka la don ha ka thup jong ki san ngut ba la pynap lypa (standby).
Ka jingïalang ban rai ïa ka jingthaw jong ka kynhun la pynlong ha ka 5 tarik mynta u bnai, ha kaba ki nongjied na ki hynriew tylli ki zonal (state) – Megha -laya, Arunachal Pradesh, Manipur, Mizoram, Nagaland bad Sikkim – ryng-kat bad u Zonal Convener u Bah Rayo-nald Kharkamni bad u Mamon Mazumdar u dkhot jong ka IPL Governing Council.
Ha ka sngi Palei, hadien ka jingïamir jingmut kaba bniah, kynthup ïa ka jingpynshisha ïa ki jingkheiñ jingdiah jong nongïalehkai kiba ïashim bynta ha ki lympung ïalehkai bapher bapher jong ka BCCI ha ka samoi ïalehkai hapoh ka ri 2025-26 bad ka lympung Senior Women’s T20 Trophy kaba dang shu kut shen, la jied ïa 15 ngut ki nongïalehkai ban mihkhmat ïa ka kynhun ïalehkai jong ka thaiñ shatei lammihngi.
Ïa ki jingïalehkai (pre-tournament camp) la buh ban pynlong naduh 16 haduh ka 21 tarik mynta u bnai. Ïa kane yn pynlong da ka Sikkim Cricket Association ha madan kriket RBDCA kaba don ha Nongkhrah, Ri-Bhoi.
Lah ban kdew ba katei ka jingïalang ka la wan shisngi shwa ba la pynthikna da u Ombudsman ka Meghalaya Cricket Association u Justice (retd) u B.D Agarwal ba u Bah Kharkamni, uba long u Secretary ka MCA, un ïai bteng ka jingshah sospon haduh u Nohprah jong u snem 2028 halor ka jingbym shim khia ka MCA ha kaba ïadei bad ka jingshah thombor ka kynhun ki ‘thei ïalehkai kriket.
U Bah Kharkamni u la shah thung kum u Zonal Convener ha ka 25 tarik u Risaw, hashwa ba ka Meghalaya High Court kan pynmih ïa ka rai ha ka 30 tarik halor ki jingujor ba la wanrah da u Bah Kharkamni bad u President ka MCA u James PK Sangma. Hadien ka hukum ka ïingbishar, u Ombudsman u la lah ban pynkut noh ïa ka kam jong ka jingshah sospon u Secretary ha ka sngi Thohdieng.
