Washington, Naiwieng:
Ka tnat Embassy jong ka US ha Saudi Arabia, ka la pynbna ïa ka jingmaham na ka bynta ki nongshong shnong jong ka America, da kaba maham halor ki jingthombor kiba lah ban jia ha ki kad liengsuiñ, ka jingkhang ïa ki Kad liengsuiñ bad ka jingpynthut ïa ki liengsuiñ hapdeng ka jingjur jong ki jingiakynad kiba ïadon bynta lang bad ki lehnoh Houthi ba la kyrshan da ka Iran bad ka Saudi Arabia.
Ha ka jingpynbna ba la pynmih ha ka Sngi Nyngkong, ka tnat embassy ka la ong ba ki Houthi ki la iadon bynta ha ki kam leh pyrshah ïa ka hima, kynthup ïa ki jingshah thombor ha ki kad liengsuiñ jong ki riew paidbah bad kiwei kiwei ki jingtei kiba kongsan kiba la pynlong ïa ki riew paidbah ban ïap bad ka jingthut kaba jur ha ka leit ka wan.
“Ki jingïaleh pyrshah ki don ka jinglah ban nang kiew stet shabar jong kata ka jaka ba marjan,” la maham ka embassy.
Ka tnat kam bar ri jong ka US, naduh ka 23 tarik u Risaw, ka la bthah ïa ki nongtrei sorkar jong ka America, ki bym dei kiba donkam kyrkieh bad kiba haïing jong ki, ba kin mih noh na Saudi Arabia, namar ka jingma na ka bynta ka jingshngaiñ.
Ka embassy ka la pynpaw shuh shuh ba ki nongtrei sorkar jong ka US kiba trei ha ka Hima ki donkam ïa ka jingbit ba kyrpang na u Heh jong ka Mission ban pyndonkam ïa kano kano ka kad liengsuiñ hadien ka jingshah thombor ha ki namding bad ki liengsuiñ bym don briew (UAV) kiba dang shen.
Ka la ai jingmut ïa ki nongshong shnong jong ka America ban long kiba husiar bha haba pyndonkam ïa ki kad liengsuiñ bad ban peit beit beit ïa ki jingtip shaphang ka jingmih jong ki liengsuiñ na ki kompeni liengsuiñ bad ki bor pynïaid jong ka kad liengsuiñ.
Katkum ka jingpynbna, ka King Khalid International Airport ha Riyadh ka la plie biang shi bynta na ka bynta ki liengsuiñ hapoh ka ri bad ki jingshakri ba la jied shabar ri ba la pynïaid da ki kompeni kit liengsuiñ jong ka ri. Ha kajuh ka por, ka King Abdulaziz International Airport ha Jeddah bad ka King Fahd International Airport ha Dammam ki dang treikam, wat la ki don katto katne ki jingpynslem bad ki jingpynsangeh.
Ka embassy ka la ong ba baroh ki jaka kyntur pud khyndew, kynthup ïa ka surok King Fahd Causeway kaba pynïasoh ïa ka Saudi Arabia bad ka Bahrain, ki dang treikam. Ki surok bah bad ki surok hapoh bad sawdong jong ka Riyadh, Jeddah bad Dhahran ruh ki la treikam.
Ka jingai jingmut ka la maham ruh ïa ki nongshong shnong jong ka America ban nym shim dur ne ban ïasam ïa ki jingtip shaphang ki jingshah khanglad jong ki missile bad ki drone bad ki jaka ba ki shah ktah, da kaba kdew ïa ki kyndon jong ka Saudi kiba lah ban pynpaw ïa ki nongpynkheiñ ïa ki kyndon aiñ.
