Shillong, Naiwieng 08
Ka Shillong Golfers Association (SGA) ka la sdang ban mih ki kynrum kynram hadien ba ki katto katne ki synjuk ka Jylla ki la ai jingkyrshan ïa ka Meghalaya Golf Promo-ters’ Society (MGPS) bad ki la ai ka jingujor sha ka Indian Golf Union.
Kane ka la wan saw bnai hashwa ba ka Jylla kan pynlong ïa ka 39th National Games, kaba la thmu ban pynlong ha u Lber jong u snem ban wan bad dangshen ha ka taïew ba la lah ki dkhot ka Games Technical Conduct Committee (GTCC) jong ka Indian Olympic Asso-ciation ki la dep jurip ïa ka jaka ïalehkai tied golf ha Golflink nalor kiwei pat ki jaka ïalehkai ha ka nongbah.
Kat kum ka kyrwoh ba la pyllait da kitei ki synjuk ha ryngkat ka jingsoi da ki nongïalam jong ki, kiba kynthup ïa ka Assam Rifles Environmental Park & Training Area, KEPTA Happy Valley, Umroi Environmental Park & Training Area, Durama Golf Course (Tura) bad Tura Golfers Association, ki la pynpaw ba ka jingweng noh ka jingkyrshan ïa ka SGA ka dei na ka daw ki nongïalam jong ka naduh u President, Secre-tary lem bad ki dkhot jong ka komiti kim shym la lah ban pynïaid ha ka rukom kaba dei bad ki la duh jingshaniah ïa ki.
La ong ba kane ka komiti kaba mynta kam shym la lah ban shim ïa ka jingkitkhlieh ha ka rukom kaba khuid ba suba bad kam shym la lah ban ai ka jingmyntoi na ka bynta ki nongïalehkai golf ka Jylla.
La ong ba ka jingbym don ka jingtreikam kaba biang pura, ka wanrah ka jingbym khuid ha ka rukom treikam bad kam shym la lah ban pynlong ïa ka Annual General Meeting la bun snem na ka bynta ban jied ïa ki nongkitkam kiba thymmai. La ong ba ka komiti kaba mynta ka la shimti ïa ka bor khlem da bud ïa ki jingai jingmut kiba shai na ki para dkhot.
La ïathuh ba u President ba mynshwa bad kiwei kiwei ki dkhot jong ka komiti ki la shah weng noh khlem da bud ïa ki rukom treikam katkum ka riti pynïaid jong ka synjuk ïalehkai.
Ka jingbymshai ha ka rukom treikam ha kaba la ïathuh ba ka kynhun ïalehkai golf kam shym la pyntip shaphang ki jingïalang jong ka synjuk, ki rai, ka jinglut jingsep, ki kot ki sla jong ka jinglong dkhot bad kiwei kiwei. Ym shym la ai ka lad kaba biang ïa ki dkhot ban ïashim bynta ha ki kam jong ka synjuk.
La ong ba katei ka synjuk kam shym la lah ban pynlong ïa ka lympung ïalehkai golf ha ka Jylla kum ka AOC Cup, States-man Cup, Farle Fuller Challenge Cup, Visitors Cup, bad ka Caddy Tour-nament, ha kaba la shu pynsangeh khlem da don ka jingïasyllok.
La ong ba ki la don ki khep ba ki nongïalehkai golf ki shah kyntait ban shim bynta ha ki lympung ïalehkai, kynthup ïa ka jingshah kyntait dangshen u Washington Marak ban shim bynta ha ka IIM Golf Tournament watla u la dep ban siew ïa ka jingpynrung kyrteng.
Ka jingkam jong ka synjuk ban mihkhmat ïa ka kynhun ïalehkai golf jong ka Jylla bad ka jingïadei jong ka bad ka Indian Golf Union, ka la mih ka jingkylli bad ka jingkynthoh.
La ong ba ka jingpynïaid kaba mynta kam shym la ban wanrah ka jingshaniah ha ki nongïalehkai bad ka la mih pynban ka jingïapher jingmut hapdeng jong ki.
