Khliehriat, Naiwieng 08
Ka Byndihati CSC ka la rung sha ka final ha ka lympung ïalehkai Super Division Football League na ka bynta ka 6th Kyr-men Shylla Contribution Trophy ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka la pynliem noh ïa ka Diengshynrum SC da 1-0 kol ha ka Qualifier -1 kaba la long ha madan Diengshynrum, Khliehriat ha ka sngi Saitjaiñ. Ïa kane ka shi kol jong ka Byndihati CSC la thep da u Lengungin Hansing ha ka minit kaba 18.
Kane ka jingïalehkai la ong ba ka la long kaba itynnad bad kaba ïakhaid bha ha kaba baroh ar ki kynhun ki la pyrshang ban ïakhun tyngeh naduh kaba sdang, hynrei ka Byndi-hati ka la lah ban pynurlong ïa ka jingjop.
Ha katei ka sngi la sam ruh ïa ka khusnam Player of the Match sha u Thinkwell Bareh na Byndihati CSC.
