Jowai, Naiwieng 10
Ka Namdong B ka la jam sha ka semi final jong ka lympung ïalehkai First Division Football League ba la pynïaid da ka Thadlaskeiñ Sports Association.
Kane ka jinglah ban pynthikna ka la wan hadien ba ka pynliem noh ïa ka Tyrshang SC da 3-2 kol ha ka quarter final kaba la long ha ka sngi Ba-ar ha Multi Sports Complex, Wahïajer.
Ïa ki kol na ka Namdong B la thep ar kol da u Phrangsngi Law ha ka minit kaba 41 & 82, bad ïa kawei pat la thep da u Edamon Dkhar (89). Katba ïa ka Tyrshang la thep da u Strongpillar Kharpomtiah (9) bad u Heipor Shylla (37).
Haba phai sha ka Super Division, ka Wahïajer SC ka la pynliem ïa ka Lurshai Larnai da 6-2 kol.
U Timmy Ryngkhlem u la khyrwit da ka hat-trick ha ka minit 22, 59 & 83, kumjuh la bynrap sa u Riburom Jat (5), Heimonmi Dkhar (67) bad u Primrose Lamat (87). Katba ïa ki kol na ka Lurshai Larnai la thep da u Ïaidon Shadap (38) bad u Enforce Kharshohnoh (45).
