Shillong, Naiwieng 10
Ka lympung ïakop siatkhnam ba la tip kum ka NTPC Senior National Archery Championship 2026 kan sdang ha ka sngi Palei ha madan Parade Umsawli, Shillong, ha kaba yn wan shim bynta da kumba 1000 ngut ki nongïalehkai na ki 44 tylli ki synjuk ïalehkai jong ka ri bad ka Meghalaya kan sei 23 ngut ki nongsiat.
Ïa kane ka lympung ïakop ka ban neh hynriew sngi kynthih, yn pynïaid da ka Archery Association of Meghalaya hapoh ka jingkhmih da ka Archery Association of India.
Ïa kane ka lympung la kyrshan lang da ka tnat ïalehkai jong ka Sorkar Jylla. Kane ka lympung kan wanrah lang ïa ka lympung ïalehkai 46th Senior Recurve, 22nd Senior Compound bad 33rd Senior Indian Round National Championship na ka bynta ki shynrang bad kynthei.
Ki bor nongpynïaid ki la pynpaw ba ïa katei ka madan Parade la thmu ban kyntiew ïa ka sha ka Centre of Excellence.
La khmih lynti ba ki nongïalehkai kin wan sha kane ka nongbah mynta ka sngi Balang. Ha ka sngi Palei, ka jingïalehkai recurve qualification jong ki shynrang kan sdang ha ka por 8 baje mynstep, bud sa ka jingplie ha ka por 10:30 baje. Ka recurve qualification jong ki kynthei kan long ha ka por shiteng sngi. Kane ka jingïakop kan kut ha ka 17 tarik, da ki 15 tylli ki jingïalehkai ban ïoh ïa ki takma ksiar ha ki jingïalehkai para marwei, kynhun bad mixed doubles.
Kumba ka paw ka jingsiat khnam ka la long shi bynta jong ka jingïalehkai tynrai ha ka jylla Meghalaya, ha kaba ka Siat Khnam ka dei ka jingïalehkai tynrai jong ka Ri Khasi, ha kaba ka dangïai bteng haduh mynta. Ka Jylla ka la nangkiew shaphrang ha kane ka jingïalehkai lyngba ka jingdon ki nongprat lynti kum u (L) Bah Woodward Sohliya ha ka jingïalehkai Indian Round naduh u 1989.
