Amlarem, Naiwieng 10
U Edison Talang ula khyrwit da ka hat-trick bad ban pynlong ïa ka Nongbareh Rim ba kan pynjem khnap ïa ka Veteran da 6-0 kol ha ka lympung ïalehkai 3rd Division Football League ba la pynlong da ka Amlarem Sub-Divisional Sports Association ha ka sngi Ba-ar ha Mini Stadium Ladjaplem, Amlarem.
U Edison u la khur ïa katei ka hat-trick hadien ba u la ïoh ban thep ha ka minit kaba 4, 23 & 42. Ïa kiwei pat la bynrap ar kol da u Convenal Talang (37 & 58) bad u Silvanos Lamin (53).
Ha ka jingïalehkai kaba bud, ka Nongtalang Shnong Thymmai ka la pynliem ïa ka Amlanai da 2-1 kol.
Tang mar ïasdang ka jingïalehkai ka Amlanai ka la pynkhih jar nyngkong lyngba u Emon Mukhim ha ka minit kaba 7. Hynrei ka Nongtalang Shnong Thymmai ka la lah ban pynphai kylla ar kol lyngba u Richester Pohchen (45) bad u Sebarious pohtam (48).
Haba phai sha kawei pat ka jingïalehkai, ka Lailyngdoh ka la jop da 1-0 kol ïa ka AYCA Ajalong bad ïa kane la thep da u Jhony Khongee ha ka minit kaba 44.
