Shillong, Naiwieng 10
Ka kynhun ïalehkai phutbol U-17 ka ri India kan sdang ban shim bynta ha ka AFC U-17 Asian Cup Uzbekistan 2027 Qualifiers jong ka Group-E pyrshah ïa ka Singapore ha ka sngi Balang ha Kuala Lumpur Football Stadium, Kuala Lumpur, Malaysia ha ka por 6:30 janmiet.
Kane ka kynhun ka la khmih lynti ban ïoh rung biang sha ka AFC U-17 Asian Cup bad ruh ban ïoh rung sha kane ka lympung ha ka sien kaba khadwei.
Ka Malaysia kaba long ka nongpynlong ïa kane ka lympung, kumjuh ka Palestine bad ka Guam ki la long kiwei pat ki kynhun. Kat kum ka kyrwoh la ong ba ka kynhun ka ban wan ha ka kyrdan ba hakhlieh kan ïoh rung sha ka AFC U-17 Asian Cup 2027, kaba la buh ban pynlong ha Uzbekistan naduh 12 haduh 29 tarik u Jymmang.
Napeng ki san tylli ki kynhun kiba don ha ka Group-E, ka India ka la long ka kynhun kaba la ïoh rung na ka bynta ka AFC U-17 Asian Cup 2026. Ka India ka la kut noh ka jingïaid na ka jingïalehkai group stage hadien ba ka la shah rem ha ka Australia bad Uzbekistan.
Te kumta ka India kan rung sha kane ka lympung ïaknieh hadien ka jingpynkhreh kaba la slem hapoh ka jingïalam u coach ba dang shu thung thymmai, u Mehrajuddin Wadoo. Ka kynhun ka la sdang ïa ka jingpynkhreh jong ka ha Goa ha u Nailur, ha kaba la bishar bniah ïa palat 100 ngut ki nongïalehkai ha ka jingjied kaba shibnai shwa ban jied ïa ka kynhun ba khatduh kaba don 23 ngut ki nongïalehkai hashwa ka Qualifiers.
Kane ka kynhun jong u Wadoo ka la leit sha Myanmar ha kaba sdang jong u Risaw, ha kaba ka la ïakhun ar tylli ki jingïalehkai paralok pyrshah ïa ka ri kaba pynlong ïa kane ka lympung, ha kaba ka la ïakhaid da 1-1 kol ha ka jingïakhun kaba nyngkong shwa ban ïoh ïa ka jingjop da 4-0 ha ka jingïakhun kaba ar.
Hadien ka Singapore, ka India kan ïakynduh ïa ka Guam ha ka 14 tarik, Palestine ha ka 17 tarik bad ïa ka Malaysia ha ka 20 tarik mynta u bnai.
