Ka Jylla jongngi ka donkam eh ban ioh ki surok kiba biang namar ki surok ki kyntiew ïa ka roi ka par ha ka Jylla bad ki shnong ki thaw ym tang hapoh sor hynrei ha baroh ki kyndong kynshrot ka Jylla. Kumta ha ka jing-iohi jong nga ka long kaba donkam eh ïa ki suok ban poi ha ki shnong ki thaw. Lada ka sorkar kmie ne sorkar Jylla ki lah ban ai ne shna. Na ka liang jongngi ki paidbah ngin da sngewkmen eh haba ka sorkar ka pynioh surok ha kano kano ka thaiñ bad ki bynta ka Jylla baroh, ngim dei ban khanglad ïa ka surok ban shna ha kano kano ka bynta jong ka Jylla ha kano kano ka District. Haba phai ha ki kynhun seng kiba peit ïa ka bha ka miat ka ri bad ka jaitbynriew ruh ngi kyntu ïa kiba ym dei ban ïa pyrshah ne long maw jynthut ïa kano kano ka jingthmu ba bha na ki bor sorkar ban shna ki surok hapoh ka ri jong-ngi.
Namar ki surok ki long ka lynti sha ka roi ka par jong baroh ki paidbah ha ka ri jongngi. Ki surok ki pynmyntoi ïa ngi ki trai ri trai muluh ym ïa ki nongwei shisngi. Kumta ngi donkam ban don ki surok kiba biang ha baroh ka Jylla. Ka jingbha ki surok ka long ka jingroi ki shnong ki thaw ha ka ri. Na ka liang ka sorkar Jylla bad ka District Council ruh kim dei ban kyntait ban ai NOC ïa ka kam shna surok la ha kano kano ka thaiñ ne hangno hangno ruh. Namar ka surok ka wanrah bad ka pynmyntoi bad pynjan hapdeng kawei ka District sha kawei pat ym tang kawei pat ka District. Ki surok ki long kiba donkam tam eh hapoh ka ri jong-ngi. Ki paidbah baroh ki da kwah hir hir ban ioh surok ha kylleng ka ri baieit jongngi. Kumta ngi kyntu ïa ki sengbhalang ban ym long mawjynthut ïaka kam tih surok hapoh ka Jylla na ka bynta ka jingmyntoi ka ri bad ka jaitbynriew.
C B. Iawphniaw
