Ranchi, Naiwieng:
Hapdeng ka jingjur jong ka jingbitar paidbah bad ka jingpynbor ha ka saiñ hima sima kaba nangjur, u Myntri Rangbah ka jylla u Hemant Soren ha ka por janmiet jong ka sngi Ba-ar u la bthah ïa ka CBI ban tohkit halor ka kam pynïap ïalade jong ka Nisha Bhagat.
U Soren ha ka post ha ka rynsan X jong u ha ka social media u la pynbna ïa kane, kaba plie lad ïa kane ka kam ban aiti sha ka tnad tohkit.
“Ka CBI mynta kan sa tohkit halor ka mukotduma jong u Nisha Bhagat. La pynmih ïa ki hukum”, la ong ka jingthoh ha ka Social Media jong u Soren ha ka rynsan X.
Naduh ba khlad noh ka Nisha Bhagat, ka sorkar jylla bad ka bor synshar pulit ki la mad ïa ka jingpynbor kaba jur bha ban pynthikna ïa ka jingtohkit kaba khlem liang.
Ka Liang Pyrshah ka la pynpaw bunsien ïa katei ka mat, katba katto katne ki seng riewlum ki la buh jingkylli ïa ka bynta jong ki pulit trai ri bad ki la dawa ban tohkit da ka tnad pdeng.
Halor ka jingkiew ka jingdawa, u Myntri Rangbah ka Jylla u Hemant Soren u la bthah ïa ki heh sorkar ban sdang noh ïa ka kam ban ai jingmut ban tohkit da ka CBI halor kane ka jingjia.
U kpa jong ka Nisha, u Handu Bhagat, u la pdiang sngewbha ïa kane ka rai jong u Myntri Rangbah ka jylla, da kaba ong ba u la shim ïa ka sienjam kaba biang por bad kaba stad da kaba ai jingmut ban tohkit da ka CBI.
U la ong ba kane ka jingleh ka la pynmih jingkyrmen ïa ka jingtohkit kaba hok bad pynpaw ïa ka jingshaniah ba ka jingshisha kan sa paw ynda ka sorkar pdeng ka la mynjur pura ïa ka jingtohkit.
Kaba kham pawnam ka long ba ha kawei ka jingïalang ‘Facebook Live’, ka Nisha ka la kynnoh ïa ka sorkar ba la ïalam da u Hemant Soren bad ki nongdie madan ba ki pyndik ïa ka.
Hadien kane, la kynnoh ba ka la khlad noh da kaba pynïap ïalade ha ka 6 tarik u Naiwieng.
Ha katei ka video kaba jan 11 minit, kaba la ïoh ha ka Facebook profile jong ka, la ïohi ïa ka Bhagat, ba ka ïam bad kynnoh ba ka jingkren pyrshah ïa ka “Sorkar Hemant Soren bad ki dalal jaka jongka, ka mut ban khot ïa ka jingïap”.
Ha katei ka video, ka Bhagat ka la kren da ka jingsngewkhia halor ka jingshah kynnoh ba ka la ïakhun pyrshah ïa ki nongleh kam sniew jong ka jaka bad ka la pynpaw ïa ka jingsngewsih halor ka jingkynthoh jong ka bor synshar ïa ki jingujor jong ka. Ka la pynpaw ruh ïa ki mat kiba ïadei bad ka jingngeit Sarna, ka jingïatai hapdeng ki Sarna bad ki Sanatan bad kaei kaba ka la batai kum ki jingbymlah jong ka rukom treikam.
Ha kajuh ka por, da kaba shim khia ïa ki khubor ba la paw ha ki lad pathai khubor halor ka jingpyniap ïalade jong u nongïalam riewlum u Nisha Bhagat, ka National Commission for Scheduled Tribes (NCST) ka la pan khubor na ki ophisar ba dei peit jong ka sorkar jylla.
Ha ka shithi sha u Chief Secretary, DGP bad Ranchi SSP, ka Commission ka la ong ba ka la rai ban pynlong ïka jingtohkit halor kane ka kam katkum ki bor ba la ai da ka Riti synshar ka ri, bad la bthah shuh shuh ïa ki ban aiti ïa ka kaiphod kaba bniah halor ka jingleh ba la leh ha kaba ïadei bad ki jingkynnoh bad ki mat ba la kdew hapoh hynriew sngi.
