Bengaluru, Naiwieng:
Haba kam ba ka jingkiew dor kan pynkhia ïa ki nongthied nongpet, hynrei u Myntri Rangbah ka Karnataka u Dr G Parameshwara u la ong ba ka la long kaba donkam ha ki katto katne ki bynta ban kyrshan ïa ki nongrep.
Haba kren ha ki nongthoh khubor ha Bengaluru ha ka sngi Balang, u Myntri Rangbah ka jylla u la kynnoh ïa ka Sorkar Pdeng, da kaba ong ba ka dei ban pyllait ïa ki jingsiew ba dei hok jong ka Karnataka, kaban pynjem ïa ka jingkit jingbah ha ka liang ka pisa tyngka jong ka jylla bad pynduna ïa ka jingdonkam ban pynkiew dor ïa ki marbam ba kongsan.
U la ong ba ki nongrep ki don hapoh ka jingeh namar ka jingkiew dor jong ka diesel bad ki mar bam. “Lada ngim kyrshan ïa ki nongrep, mano ban kyrshan?” la ong u Deputy CM, haba ïada ïa ka rai ban pynkiew dor ïa ka dud.
“Lada ka sorkar pdeng ka kloi ban ïarap ïa ngi, kane kan ym jia,” u la bynrap.
Halor ka jingpynkiew ïa ka jingbuh kyrpang ha ka jylla sha ka 56% na ka 50% kaba la don lypa, u DCM u la ong ba ka jylla ka la mudui ïa ka jingujor shuti ba kyrpang ha ka ïingbishar ba ha khliehduh pyrshah ïa ka hukum jong ka High Court jong ka Karnataka kaba dang shen kaba la weng noh ïa ka rai jong ka jylla ban ai 56% ka jingpynsah jaka.
U la kyntu ïa ka sorkar pdeng ban pynrung ïa ka Reservation Policy jong ka hapoh ka 9th Schedule jong ka Riti synshar ka ri.
“Ka Tamil Nadu ka don ïa kane ka kyndon bad ka la pynkiew ïa ka jingbuh kyrpang sha ka 69%. Haba ka jylla ba marjan jong ngi ka la leh ïa kane, balei ngim lah?, la ong u Myntri Rangbah ka jylla.
