Mumbai, Naiwieng:
Hapdeng ka jingsawa kaba thymmai halor ka jingpynïasoh lang jong ki arliang mamla jong ka Nationalist Congress Party, u MP ka Shiv Sena (UBT) u Sanjay Raut ha ka sngi Balang u la kam ba 20 haduh 22 ngut ki MLA jong ka NCP ba ïalam da u Sunetra Pawar ki lah ban ïapra noh.
Haba ïakren bad ki nongthoh khubor, u Raut u la ong ba ki MLA ka NCP kiba leit jngoh ïa u president ka NCP (SP) u Sharad Pawar kim shym la shu ïakren kai, bad u la ai dak ba ka don shuh shuh ha kine ki jingïalang. U la kynnoh shuh shuh ba hadien ka jingïap jong u Ajit Pawar, ki nongthaw aiñ jong ka NCP ki la shah pynduna sha ka jinglong “mraw”.
“20 haduh 22 ngut ki MLA jong ka seng jong ka Sunetra Pawar ki lah ban ïakhlad noh ha kano kano ka por….Lada ki wanphai biang sha la ïing jong ki kmie ki kpa (NCP ba la ïalam da u Sharad Pawar), te kam dei ka jingpynïasoh lang. Lane ki lah ban ïasoh bad kano kano kawei pat ka seng shwa ka jingthep vote,” bynrap biang u Raut.
Ha ka sngi Ba-ar, u Myntri Rangbah ka Maharashtra, u Devendra Fadnavis, u la ong ba ka jingpynïasoh ïa ka NCP kam lah ban jia khlem da ïasyllok bad ka BJP.
Halor kane, u Raut u la ong ba kane kam ïadei bad ka seng jong u Sharad Pawar.
Halor ka jingthep vote jong ka Gokul Dairy, u Raut u la ong ba ki jingpynroi ha ka seng dud kaba don ha Kolhapur ki long kiba ktah ïa ka synshar paidbah.
U Rajesh Patil, nongïalam ka NCP, uba dei u kyrtong jong ka Mahayuti, kaba don ha ka liang synshar, ula jop ha kane ka elekshon, kaba la don ka jingïatainia kaba jur bha, na ka bynta ka shuki Chairman jong ka Gokul Dairy, hadien ba ka sorkar jylla, ka la pynïeng sa saw ngut ki director, kiba don ïa ka hok thep vote, sha ka board jong katei ka Dairy.
Ki myntri Mahayuti ki la dem khrup ha ka kyrdan kaba rit ha ka por baroh kawei, la ong u Raut, bad u la maham ba “baroh ki sngi kim long kumjuh ha ka saiñ pyrthei”.
Ka jingjop ka la shah knieh noh na ka panel jong u MLC ka Congress u Satej Patil uba la ïoh ïa ka jingbun paid ha ka elekshon ha ka taïew ba la dep, la ong u Raut.
Halor ka jingkynthoh jong u Fadnavis ba u kyrshan ïa ka Gokul Dairy ym ïa uno uno u briew shimet, u Raut u la ong ba ha kata ka khep un ym jin da la wanrah ïa ka aiñ ban thung saw ngut ki Director ba la jied da ka sorkar.
