9 kol pynliem ka Shillong Lajong ïa Sei La Sap, lamkhmat ka Mawlai ha ka Champions Cup

Shillong, Naiwieng 15 Ka Shillong Lajong FC ka la thep haduh 9-0 kol ïa ka Sei La Sap, katba ka Mawlai SC ka la pynliem ïa ka Mawpdang SC da 3-1 kol ha ka lympung...

Shillong, Naiwieng 15

Ka Shillong Lajong FC ka la thep haduh 9-0 kol ïa ka Sei La Sap, katba ka Mawlai SC ka la pynliem ïa ka Mawpdang SC da 3-1 kol ha ka lympung ïalehkai SSA Champions Cup 2026 ha ka sngi Saitjaiñ ha SSA Stadium, Polo.

Ha lyndet jong kane ka nam jop kaba heh tam ha kane ka samoi ba mynta jong kane ka lympung da ka Shillong Lajong ka la wan hadien ba u Lalmuan-sanga (4′, 50′, 51′) u la khur ïa ka hat trick ba nyngkong eh jong u bad ïa ki kol kiba sah la ïoh ban thep pat da u Colinsalmon Lyngdoh (34′), Ïohborlang L Lyngkhoi (42′), Eman-bha Mar-baniang (46′), Deibor-mame Tongper (81′) bad u Fridison Wanñiang (83′) bad ha ka minit ba 12 ba la kum thep hi da ki rangïalehkai ka liang pyrshah.

Ka jingïakhun hi ka long ba ka Shillong Lajong ka la ïalehkai beit kumba ka dei ha kaba tad haduh ban da kut ka kylla step, ka la ïoh ban thep haduh saw kol.

Ha kane ka jingïakhun ka Sei La Sap ka kynhun kaba don ïa la ka shlem ai jinghikai (football academy) ha Upper Shillong, ki la pyrshang ban tehlakam na shadien bad ban ïalehkai nalor (long ball), kaba kam shim la lah ban khanglad satia ïa ka Lajong ba kan jam shakhmat ha kane ka jingïakhun.

Hadien kane, ka Maw-lai, kumba la kdew haneng ka la ïoh mad ïa u soh ka jingjop ha ka jingïakhun jong ka Group-A hadien ba ka la lah ban pynliem da 3-1 kol ïa ka Maw-pdang SC, kaba hangne ka nam tam ka la wan lyngba u Wadshwa Latoo (13′, 52′) uba la lah ban lamkhmat ïa ka kynhun ban thep ar kol bad ïa kawei pat la thep da u Lovingstar Suting (90’+5). Ïa ka shi kol na bynta ka Mawpdang la thep ia ka da u Donlad Diengdoh (78′).

Ka jingïakhun hapdeng kine ki ar kynhun ka lam itynnad bad ba ïa biang bor bha, katno tam lei lei ba na ka liang u rangap kol ka Mawpdang u Embhahlang Khongnoh, u la lah ban kyrda (save) ïa kumba katto katne tylli ki bol ba la pyrshang pynkhih jar da ki rangïalehkai ka Mawlai.

Nalor kata don ruh ki khep ba ka Mawpdang ka la pyrshang lem na ka liang jong ka ban sam lyngba ïa ka kut ïalehkai ka Mawlai, ha kaba kawei na ki nuksa jong kane ka jingpyrshang ka la wan mih paw lyngba u Banaijingshai Kharkongor, uba la ïoh ban tehlakam ïa ka bol bad ula shut jam ïa ka bol kaba la her shabar na ka kol.

Hynrei ka kol kaba la ïoh ban thep da u Donlad ka la ai mynsiem ïa kane ka kynhun, kaba shipor, ka la lam sha kaba ïakhaid bha, hynrei ka Mawlai SC ha ka buit ka bor ïalehkai jong ka, ba kan ïoh thep ïa ka kol kaba lai lyngba u Lovingstar, kaba dei artad ka kol ba khatduh jong kane ka jingïakhun ha shwa ba u rephri un pynwai noh ïa kane ka jingïakhun.

Kumta ha kaba kut ki ar kylla (two rounds) jong ka jingïakhun, ka Mawlai ka la lamkhmat ha ka Group-A hadien ba kan khur 6 poiñ bud sa ka Mawpat (4 poiñ) bad don ha ka kyrdan kaba ar.

Ha ka Group-B la lamkhmat da ka Lajong (6 poiñ), katba don lai tylli ki kynhun ba la khur mar 3 poiñ bad kine ki kynthup ïa ka Mawkhar SC, Sohryngkham SC bad ka Sei La Sap.

Ki jingïalehkai mynta ka sngi jong ka Group-A kin long hapdeng ka Mawpat SC pyrshah ïa ka Lamlynti FC ha ka por 11 baje mynstep bad ha ka Group-B kan long hapdeng ka Mawkhar SC ïa ka Sei La Sap ha ka por 2:30 nohphai sngi.