Khliehriat, Naiwieng 15
Ka Diengshynrum ka la rung sha final ha ka lympung ïalehkai Super Division na ka bynta ka 6th Kyrmen Shylla Contribution Trophy ba la pynïaid da ka East Jaiñtia Hills District Football Association, hadien ba ka la pynliem ïa ka Chirhruphi SYWSC lyngba k tie-breaker da 5-3 kol ha ka sngi Saitjaiñ.
Ha kane ka jingïakhun semi final kaba la long ha madan Diengshynrum kaba ha Khliehriat, kine ki kynhun ki la ïathep mar shi kol haduh kaba kut ka jingïalehkai. Ka Chiehruphi ka la pynkhih jar nyngkong ha ka kylla step lyngba u Wanrilanki Lamare (25), hynrei ka Diengshynrum ka la pynphai kylla ha ka kylla miet lyngba ka penalty ba la shut da u Th Aktar Hussain (73).
Namar ka jingïakhaid, la rah ïa kane ka jingïakhun sha ka jingïashut tie-breaker ha kaba ka Diengshynrum SC ka la jop da 5-3 kol ïa ka liang pyrshah.
Ïa ka nam Player of the Match la khur da u Hame Nongtdu jong ka Diengshynrum SC.

