Shillong, Naiwieng 15
Ka India ka lah ban ïalehkai bha ha ka kylla step na ka bynta ban pynliem noh ïa ka Bhutan da 2-1 kol bad ka la rung final ha ka SAFF Championship 2026, ha ka sngi Saitjaiñ ha National Stadium kaba ha Dhaka, Bangladesh.
Kane ka kynhun ïalehkai ka ri ka la khmih lynti ban khur ïa ka nam lahduh kaba shiphew ha kane ka lympung.
Ha kane ka jingïakhun semi final u Vishnu PV lem bad u kapten u Chinglensana Singh Konsham ki la lah ban thep kol hashwa ban kut ka kylla step, hynrei u Kinzang Tashi Tobden u la lah ban pynphai kylla shi kol hadien ar minit ba la sdang ïa ka kylla miet na ka bynta ka Bhutan.
Kane ka long sien kaba nyngkong eh ba ïa ka Video Assistant Referee, la pyndonkam ha kane ka lympung, na ka bynta ban bishar bniah ha kaba ïadei bad ka jingshim rei halor ka offside pyrshah ïa ka kol jong ka Bhutan hashwa ban weng noh ïa ka penalty ba la ai sha ka India.
Te kumta ka India kaba la khur teng ïa ka nam lahduh kan pynkhreh ban ïaknieh nam lahduh ha ka sngi Ba-ar (17 tarik) pyrshah Pakistan, kaba la jop da 1-0 kol ïa ka Bangladesh ha ka semi final kaba ar.
Kaba sngewtynnad hangne ka long ba u rangïalehkai ka jylla Meghalaya n aka shnong Lait-lyngkot, u Ricky John Shabong u la ïoh ka lad ban mih madan naduh kaba sdang ha kane ka jingïakhun.
Na ka liang u coach ka kynhun u Naushad Moosa u la kylliang saw ngut ki rangïalehkai kiba kane ka kynhun ka la pynliem ïa ka Maldives ha ka jingïakhun group ba la dep, ha kaba u la pynneh da u Arsh Anwer Shaikh ha ka bynta kaba shakhmat bad wanrah ïa u Vishnu, u Manglenthang Kipgen bad u Nikhil Prabhu ba kin ïalehkai naduh kaba sdang.
Ka Bhutan, kaba la ïakhun ïa ka semi final ba nyngkong jong ka, ha ka SAFF Championship ha ki 18 snem mynshwa, ka la pyrshang ban ïakhun tyngeh pyrshah ïa ka India. Hynrei ka India ka la shim por tang kumba katto katne por ban pynskhem ïa ka jingïalehkai, hynrei dei ha ka minit kaba 9 ba ka la ïoh ban pynkhih jar. Kane ka la wan urlong lyngba u Vishnu, uba la lah ban pynpra ïa ki rangïalehkai ‘dien lem bad u rangapkol u Gyeltshen Zangpo.
Kane ka shi kol ka la nangpynïoh mynsiem ïa ka India na ka bynta ban ïakhun tyngeh shuh shuh ha kaba ka la jan ïoh thep kol biang ha ka minit kaba 17 hadien ba u Brison Fernandes u la ïarap ban pynbuh bol na ka bynta u Suhail Ahmad Bhat, hynrei u Zangpo u la lah ban pyllait na ka jingshah thep.
Hadien ar minit u kapten ka Bhutan, u Chencho Gyeltshen u la pyrshang ban pynphai, na ka daw ka jingïakhun tyngeh ki rangïalehkai ka India.
Ka India ka la bteng ban pynurlong ïa ki kabu ha kaba u Ricky Shabong u la ïoh ban shut ïa ka bol, hynrei um shym la lah ban pynurlong ha ka minit kaba 21 hadien ka jingshah khanglad noh ha u Tenzin Norbu. Hadien ar minit, u Abhishek Suryavanshi u la ïoh ban shut ïa ka bol ha kaba ka la poi sha u Fernandes, hynrei um shym la lah ban pynurlong hadien ba ka bol kaba u la ïoh ban shut ka la leit dei na diengkol.
Kane ka jingïai pyrshang ka India ka la wan urlong na ka bynta ban thep ïa ka kol kaba ar ha ka minit kaba 27. Kane ka la wan hadien ba u Kipgen u la ïoh ban shut ïa ka corner, hynrei ka Bhutan kam shym la lah ban khanglad bad u Chinglensana, um shym la pynlehnohei ïa kane ka kabu ksiar ban thep ïa ka kol kaba ar.
Haduh kaba kut ka kylla step ka Bhutan kam shym la lah ban pynphai bad ka India ka dangtam da 2-0 kol.
Hadien ba la bteng ïa ka kylla miet ka Bhutan ka la ïakhun tyngeh bad dei ha ka minit kaba 48 ba ka la lah ban pynurlong na ka daw ba ka India kam shym la lah ban teh lakam ïa ka free-kick. Kane ka la wan lyngba u Gyeltshen, uba la shut ïa ka bol ha kaba ka la poi sha u Tobden, uba la lah ban thep da ka khlieh. Ha ka jingshisha ha kaba nyngkong la pyni ba ka dei ka offside, hynrei ki rangïalehkai ka Bhutan ki la ïoh ban lehkmen hadien ba la bishar bniah lyngba ka VAR.
Hadien kane ka shi kol u Moosa u la pynmih ïa u Macarton Nickson ha ka jaka u Kipgen bad u Irfan Yadwad ha ka jaka u Vishnu ha ka minit kaba 64.
Hashwa ban wai kine ki kynhun ki la pyrshang ban ïai bteng ha ka ban ïakhun tyngeh, hynrei kim shym la lah shuh ban thep bad ha kaba kut ka India ka la khur ïa ka jingjop.

