Shillong, Naiwieng 15
Ka Mawsawrit SC ka la pynliem noh ïa ka Mawdngong SC da 3-0 kol na ka bynta ban khur jingjop ha ka lympung ïalehkai First Division Football League ba la pynïaid da ka Tyrsad Area Sports Association (TASA) ha ka sngi Saitjaiñ.
Ha katei ka jingïakhun kaba la long ha madan Mawlum ha Tyrsad, ka kynhun ïalehkai ka Mawsawrit ka la lah ban pynpaw ïa ka jingtbit ha ka rukom ïalehkai ha kaba ka la ïoh ban thep ar kol ha ka kylla step lyngba u Bitdorlang Nongbet ha ka minit kaba 21 bad u Chesterfield Kharsyntiew ha ka minit ba 39 na ka bynta ban tam da 2-0 kol
Katei ka kynhun ka la ïakhun tyngeh shuh shuh ha ka kylla miet bad san minit shwa ban wai ka la ïoh ban thep ïa ka kol kaba lai lyngba u Dame Dotni (85). Haduh kaba kut ka jingïalehkai ka Mawdngong kam shym la lah ban pynphai bad ka la mad ïa ka jingshah rem.
Hab phai sha kawei pat ka jingïalehkai kaba la long kham hashwa hapdeng ka Rangshangkham SC bad ka Mawkynroh SC ki la ïakhaid mar 1-1 kol.
Ka Rangshangkham ka la pynkhih jar nyngkong lyngba u Danial L. Nonglait ha ka minit kaba 19, hynrei ka Mawkynroh ka la pynphai kylla lyngba u Toberwel Marngar (22).
Kane ka lympung kan bteng biang ha ka 18 tarik ha kaba ka Wahlyngkien Sunei SC kan ïakhun pyrshah ïa ka Umkaber SC ha ka por 12 baje mynsngi bad ka Umkseh SC ïa ka Thaiñthynroh SC ha ka por 2:30 nohphai sngi.

