Pan jingïarap ki nongïalam ka Congress ha Assam na ka bynta ki longïing ba la duh jaka sah

Guwahati, Naiwieng: Ki heh nongïalam jong ka Assam Congress ki la kyntu ïa u Myntri Rangbah ka jylla u Himanta Biswa Sarma ban ai jingïarap bad pynbha mardor ïa kumba 1000 tylli ki longïing kiba...

Guwahati, Naiwieng:

Ki heh nongïalam jong ka Assam Congress ki la kyntu ïa u Myntri Rangbah ka jylla u Himanta Biswa Sarma ban ai jingïarap bad pynbha mardor ïa kumba 1000 tylli ki longïing kiba la shah pynkynriah jaka ha ka por ba la pynlong ïa ka jingpynkynriah jaka ïa ki longïing ha Dhubri distrik ha kaba sdang jong une u bnai.

Ha ka jingthoh jingkynmaw sha u Myntri Rangbah ka jylla, u Wazed Ali Choudhury, MLA na Birsing Jarua bad nongïalam ka Assam Congress Legislature Party (ACLP), bad u Abdur Rahim Ahmed MLA na Chenga bad Chief Whip ka ACLP, ki la pynpaw ïa ka jingeh jong ki longïing kiba shah ktah na ka jingshah beh shnong hapoh ka Alamganj Part 9 Revenue Village hapoh ka Gauripur Revenue Circle.

Katkum ka jingong jong ki riew thawaiñ, la ong ba ka jingpynkynriah jaka ïa ki longïing ka la long naduh ka 1 tarik, Naiwieng, 2026, ha kaba ki la don kumba 1,000 tylli ki longïing ki bym don ïing don sem shuh.

Ki la ong bun na ki longïing kiba la shah ktah ki la im la sah ha kane ka thaiñ, katba katto katne tylli ki la duh noh hashwa ïa ki ïing jong ki na ka jingshah rong noh ha ka wah.

Ka jingthoh jingkynmaw ka la ong ba ka jingshah pynkynriah jaka ka la wanrah ïa ka jingeh kaba khraw, khamtam eh ïa ki khynnah, ki tymmen, ki kynthei ba armet bad kito kiba pang.

Haba ki kam ïa ka bor jong ka sorkar ban pynkhuid ïa ki jingshah thombor ha ki jaka sorkar, ki nongïalam ka Congress ki la ong ba kum kine ki jingleh ki dei ban shim khia ruh ïa ka jingsngewkhia jong ka jinglong briew bad ka hok jong ki briew kiba shah ktah.

Ki la kyntu ïa u Myntri Rangbah ka jylla ban tuklar kyrkieh, ban ai jingïarap bad pynbha ïa ki longïing kiba la shah pynkynriah jaka, bad ban pynsangeh noh ïa ki jingpynkynriah briew tad haduh ban da shim ïa ki lad ki lynti kiba biang ban pynbeit ïa ka jinglong jingman jong ki.