Imphal, Rymphang: Ka seng kieng atiar kaba na ka jylla Manipur, ka National Revolutionary Front, Manipur (NRFM) ha ka 16 tarik mynta u bnai ka la kam ïa ka jingdonkti jong ka ha ban pynïap ïa ki 2 ngut ki nongkhaïi droks ha 2 tylli ki thaiñ jong ka jylla.
Ha ka kyrwoh ba la pyllait da u information and publicity secretary jong ka NRFM – Sanajaoba Meitei u la pyntip ba ka seng ka la phah ïa ki dkhot jong ka ban pynïap ïa u Kayenpaibam Nganga (26 snem ka rta) na ka daw jong ka jingdonkti jong u ha ki kam khaïi beaiñ ïa u droks. Ïa ka metïap jong u Nganga la ïoh ban tam naduh ka wah Heingang ha ka 14 tarik mynta u bnai.
Kat kum ka kyrwoh la ïathuh ruh ba ki dkhot jong ka seng ki la leit ruh ban pynïap ïa kawei ka samla kynthei kaba la tip kyrteng kum ka Hoikhling (26 snem ka rta) na ka daw jong ka jingdonkti jong ka ha ki kam khaïi droks. Kum ban shu ïathuh hangne, ka Hoikhling ka la shah siat ïap ha ka 17 tarik u Risaw, 2022 hajan ka ïing sah jong ka kaba don ha ka shnong Pholjang, Churachandpur district.
Ha ka jingpyllait kyrwoh jong ka NRFM ka la maham ruh ba kan sa ai da ka jingsneng kaba tyngeh pyrshah ïa kiwei kiwei ki nongkhaïi droks, ki nongrahbor bad kumjuh ruh ki nongdie drok kiba donkti ha ki kam beaiñ.
Haba phai sha kawei pat ka kyrwoh, na ka liang ka tnat pulit jong ka jylla Manipur ha ki jingleit khynra ha ki 24 kynta kiba la leit noh ki la ïoh ruh ban kem ïa 3 ngut ki dkhot jong ka seng NRFM.
Na kitei ki 3 ngut, ki bor pulit ki la ïoh ruh ban kurup ïa kawei ka pistol ha ryngkat ka ‘magazine’, 5 tylli ki kuli 7.65, 3 tylli mobile, ka pisa T.220, kawei ka Aadhaar bad PAN Card bad kawei ka thuk thuk Honda Activa.
Kat kum ka jingpyllait kyrwoh jong ka tnat pulit la pyntip ba u Thounaojam Hemba Singh (19 snem ka rta) na ka thaiñ Kongba u la shah kem ha ryngkat ka pistol najan ka City Convention. Da ka jingtohkit pyrshah ïa utei u runar, ki bor pulit ki la ïoh ban kem sa ïa 2 ngut kiwei pat ki dkhot jong ka NRFM. Ki 2 ngut ki dkot ka NRFM kiba la shah kem ha katei ka sngi ki kynthup ïa u Sagolsem Rahul Meitei (19 snem ka rta) na Bamon Kampu, Imphal East district bad u Khulem Shyam Singh (19), na Khongpal Chaingangbam Leikaki, Imphal East district.
Ïa kitei ki 3 ngut ki dkhot ka NRFM kiba la shah kem ha katei ka sngi la leit ban aiti noh sha ki bor pulit jong ka Porompat PS na ka bynta ki kam tohkit kiba dang sah.
