Agartala, Lber:
Ki bor pulit jong ka jylla Tripura ki la pyntip ba ha ka miet jong ka Sngi Palei ba la dep ki la ïoh ban kem ïa uwei u runar bad na ka met jong u, ki la ïoh ruh ban kurup ïa kawei ka pistol bad katto katne u drok. Ki la pyntip ba ïa utei u runar ki la ïoh ban kem na Ramthakur Sangha, Agartala.
Haba ïakren bad ki lad pathai khubor, na ka liang u Sadar Sub-divisional Police Officer (SDPO) – Ajay Kumar Das u la pyntip ba dei hadien ka jingshah kem jong ki 4 ngut ki nongdie droks ba ki la ïoh ban kem sa ïa utei u nongkhaïi droks ha ka miet jong ka sngi Palei ba la dep.
U runar u ba la shah kem ha ka miet jong ka sngi Palei u dei u ba la tip kyrteng kum u Sunny Saha bad na ka ïing sah jong utei u runar, ki bor pulit ki la ïoh ban kurup ïa 1500 tylli ki yaba tablets, katto katne u heroin, kawei ka pistol, 2 tylli ki kuli bad kawei ka kali.
Kat kum ka jingïathuh jong u heh pulit u la pyntip ruh ba ki bor pulit ki la sdang ruh ban pynlong ïa ka jingtohkit pyrshah ïa u trai ïing jong ka ïïng sah wai kaba utei u runar u sah. Hynrei kim shym la ïathuh pat ïa ka kyrteng jong u trai ïing namar ba dang pynlong ïa ki jingtohkit.
