Imphal, Lber:
Ki bor pahara jong ka jylla Manipur ki la pyntip ba ha ka Sngi Palei ba la dep ki la ïoh ban kem ïa uwei u dkhot jong ka seng kieng atiar People’s Liberation Army (PLA) na ka thaiñ Kumbi Thingel Leikai, Bishnupur district.
Kat kum ka kyrwoh ba la pyllait da ki bor pahara ki la pyntip ba hadien ka jingïoh jingtip halor ka jingdon jong ki dkhot seng kieng atiar ha katei ka thaiñ, ki bor shipai ka Assam Rifles ha ryngkat ka jingwan ïasnohkti lem ki bor pulit ka thaiñ Bishnupur ki la leit ban pynlong ïa ki jingkhynra bad ïoh ban kem noh ïa utei u ehrang.
U dkhot ka PLA u ba la shah kem ha katei ka sngi u dei u ba la tip kyrteng kum u Wahengbam Paikhomba.
Hadien ka jingshah kem, ïa u la leit ban aiti noh sha ki bor pulit ka Kumbi Police Station na ka bynta ban pynlong ïa ki jingtohkit kiba dang sah.
