Agartala, Lber:
U nongïalam ba rangbah jong ka BJP na ka jylla Tripura – Biswabandhu Sen, MLA ha ka 24 tarik mynta u bnai u la shah jied ban shimti ïa ka kam kum u Shongknor ba thymmai jong ka Ïing Dorbar Thaw Aiñ jong ka jylla. U Biswabandhu Sen u la ïakhun pyrshah ïa u nongïalam ba rangbah jong ka seng Congress – Gopal Roy na ka bynta ka shuki Shongknor Ïing Dorbar Thaw Aiñ.
Ïa ka ilekshon na ka bynta ka shuki Shongknor jong ka Ïing Dorbar Thaw Aiñ jong ka jylla Tripura la pynlong ha ka 24 tarik mynta u bnai – kaba dei ruh ka sngi ba la pynsdang nyngkong eh ïa ka Dorbar jong ka Sorkar Jylla kaba thymmai.
Kat kum ki jingïoh lum khubor, u Biswabandhu Sen (69 snem ka rta) mynshwa u dei u nongmihkhmat na ka seng Congress haduh 5 samoi hynrei ha u snem 2017 u la leit ban pynïasoh noh ïalade bad ka seng BJP.
Kat kum na ka ilekshon kaba la pynlong ha ka 24 tarik, u Sen u la shah jied ban shimti ïa ka shuki Shongknor hadien ba u la ïoh haduh 32 ‘vote’, pyrshah ïa u Gopal Chandra Roy na ka seng Congress u ba la ïoh tang 14 tylli ki ‘vote’.
Hadien ba u Sen u la shimti ïa ka shuki Shongknor jong ka Ïing Dorbar Thaw Aiñ ka jylla, na ka liang u Myntri Rangbah jong ka jylla – Dr. Manik Saha u la phah ïa ka kyrwoh kit bok kit rwiang ïa u Sen bad pynpaw ruh ïa ka jingkyrmen ba ka Ïing Dorbar Thaw Aiñ jong ka jylla kan sa poi sha ki kyrdan kiba kha shaneng hapoh ka jingïalam jong u Biswabandhu Sen.
