Guwahati, Lber:
U Myntri Rangbah jong ka jylla Assam, u Himanta Biswa Sarma ha ki khyndiat sngi kiba la leit noh u la pynlong ïa kawei ka jingïalang kaba la wan ban ïashim bynta da ki karikor bad ki nongmihkhmat jong ka kynhun sorkar pdeng kaba dei khmih halor ka jingpyntreikam ïa ka skhim Jal Jeevan Mission (JJM). Ïa katei ka jingïalang la pynlong ha Pragjyoti ITA Centre for Performing Arts.
Ha katei ka jingïalang na ka liang u Myntri Rangbah u la bthah ïa ki kynhun kiba pyntreikam ïa katei ka skhim ba kin dei ban pyndep noh ïa ki jingtrei baroh hashwa ban kut u bnai Nohprah jong une u snem ba mynta.
Haba ïakren bad ki nongmihkhmat jong ka kynhun pyntreikam ïa ka skhim JJM ha Assam, na ka liang u Myntri Rangbah u la pyntip ba watla ïa ka tarik ba khatduh ban pyndep ïa baroh ki jingtrei jong ka skhim la buh ha ka 31 tarik u Lber, 2024 – dei pat ban shim ïa ki lad ki lynti bad ki sienjam kiba kyrpang khnang ba yn lah ban pyndep ïa ki kam baroh hashwa ban kut u snem 2024.
Ka skhim JJM ka dei ka skhim kaba la wanrah da ka Sorkar Pdeng na ka bynta ban pynbiang ïa ki kor umdih sha baroh ki longïïng jong ki thaiñ nongkyndong kylleng ka ri India. Ïa katei ka skhim la buh thong ban pyndep trei hashwa ban kut jong u snem 2024.
Ha ka jingïalang kaba la pynlong ha nongbah Guwahati, na ka liang u Myntri Rangbah u la bthah ruh ïa ki karikor ba kin pynkhreh ïa ka ‘blueprint’ na ka bynta ban pyndep ïa ki kam baroh kiba dang sah jong katei ka skhim. U la ong ruh ba nalor ka tarik ba la buh ban pyndep kham kloi ïa katei ka skhim, dei ruh ban khmih bad jurip bniah halor ki mat kiba ïadei bad ka jinglah ban pyndep trei kam khlem da don kano kano ka jingpeit shilliang.
Ha ka jingïalang, na ka liang u Myntri Rangbah u la ong ruh ba lada ki karikor kim shym la lah ban pyndep janai ïa ki kam kiba la bynshet ha ki, ka sorkar kan sa shim da ki sienjam kiba tyngeh ban pynshitom pyrshah ïa ki, kynthup ruh ban ruid dak saw ïa ki kyrteng jong ki. U la pyntip ba katei ka jingmaham kan trei kam ruh na ka bynta ki ophisar bad ki enjiniar.
Kiwei kiwei ki ‘riew pawkhmat kiba la wan ban ïashim bynta lem ha katei ka jingïalang ki kynthup ïa u Myntri ka Tnat PHE jong ka jylla – Jayanta Mallabaruah, u Additional Chief Secretary ka tnat PHE – Syedain Abbasi, u Mission Director ka skhim JJM – Kailash Karthick N bad kiwei kiwei ki heh ophisar.
