Gangtok, Lber:
Ka shnong Sokpay kaba don ha Sikkim jong ka Gangtok ka la shah ktah jur na ka jingdon jong ka jingtwa khyndew ha ka step pyrngab jong ka sngi U Blei. Ka jingtwa khyndew ka la wanrah ïa kiba bun ki jingjulor ïa ka surok bah ha ki bynta jong ka Dikchu-Rakdong Road.
Kumba la ïathuh ka tyllong khubor, la ong ba ki la don kumba saw tylli ki ïing kiba la shah pynjulor lut bad kumba 18 tylli ki longïing kiba la shah ktah jur na ka daw jong ka jingdon jong kane ka jingtwa khyndew. Ki heh sorkar jong kane ka thaiñ ki la pynkynriah shnong noh ïa kumba 15 haduh 20 tylli ki longïing kiba sah hajan ki ar tylli ki ïing kiba la julor. Ki la don ruh ki jingri kiba la jah ha ka jingjia jong ka jingtwa khyndew. U District Magistrate u Tushar Nikhare bad kiwei pat ki heh sorkar kiba dei khmih na Gangtok Distrik ki la leit sha katei ka jaka ba la jia katei ka jingjia ha ka por shiteng sngi jong ka sngi U Blei na ka bynta ka jingleit jurip bniah.
Ki la don kumba ar ngut ki trai jong ki ar tylli ki ïing kiba la shah pynjulor kiba la ïoh ïa ka jingïarap pisa kaba mar T. 1,30,000; ïa uwei u trai jong ki masi la ai T. 40,500 bad u trai jong kawei ka dukan kaba la shah pynjulor u la ïoh T. 25,000, la ïathuh u heh sorkar. Ka jaka treikam jong ka Animal Husbandry ruh ka la shah pynjulor na ka jingtwa khyndew. Ka jingtwa khyndew ka la jia ha ka por 2:30 haduh 3 baje mynstep jong katei ka sngi.
Kumba la ïathuh ki nongshong shnong jong katei ka thaiñ, la ong ba ki la don shibun ki jingleit khmih bniah ïa kiba la pynlong da ki heh ba dei khmih ha ki por ba la leit bad la ong ba la ai jingmut ruh kumno ban ai jaka sah ïa ki lanot ha ki jaka ba lait na ki jingma. Ha kaba ïadei bad kane, ki heh sorkar ki la kular ban ai jingïarap sha ki lanot kiba la shah ktah jur na ka jingtwa khyndew.
