Dibrugarh, Lber:
Arngut ki kynhun lehnoh jong ka seng National Socialist Council of Nagaland-Khaplang (NSCN-K) ki la lait phet na Khonsa jail ha Tirap district jong ka Arunachal Pradesh. Ki tyllong ki iathuh ba arngut ki pulit constable jong ka Arunachal Pradesh ki la mynsaw jur ha ka jingiakhun bad ki kynhun lehnoh haba ki la pyrshang ban iada ia ki lehnoh na jinglait phet.
Uwei na ki arngut ki constable kiba la mynsaw, uba la ithuh kyteng kum u Wangnyien Bosai, u la khlad noh ha lynti ban leit sha Assam Medical College and Hospital (AMCH) ha Dibrugarh.
La ong ba uwei pat u constable u don hapdeng ka jingmynsaw kaba jur. Katkum ki tyllong khubor ki arngut ki dkhot jong ka kynhun lehnoh NSCN-K kiba la ithuh kyrteng kum u Rocksen Homchha bad Tipu Kitnya ki la iakhun tyngeh bad ki arngut ki constable, kiba la pahara ia kane ka patok ha kata ka por. La ioh jingtip ruh ba kine arngut ki lehnoh ki la knieh ia ki suloi jong kine arngut ki nongpahara jong ka patok hadien ba ki la thombor ia ki bad phet na ka patok ha Arunachal Pradesh. La pynlong ka jingthwet da ki pulit ka Tirap ha Arunachal Pradesh ban ioh kem ia kine arngut ki lehnoh kiba la lait phet. Ka Assam Rifles bad ka CRPF ki la iarap ruh ha kane ka jingthwet ia ki.
