Imphal, Lber:
Katkum ki khubor la ong ba u Myntri barim jong ka Manipur, u RV Mingthing uba long u nongialam ba paw khmat jong ka Tangkhul Naga, u la khlad noh ha ka Sngi Ba-ar ha ka rta ba 92 snem hapoh ka iingsah lade ha ka shnong Kuirei jong ka distrik Ukhrul jong ka jylla Manipur.
La kha ia u Mingthing ha ka 20 tarik u Iaiong jong u snem 1931, u la long ruh u President jong ka Manipur State Congress (MSCP) ha ki snem 2004 haduh 2007.
U la jop ia ka shuki MLA na ka konstitwensi Chingai napoh ka distrik Ukhrul jong ka Manipur bad u la bat ruh ia ka shuki Minister of State ha ka tnat Tribal Affairs & Sports ha ki snem 1989 haduh 1990.
U Mingthing u la bat ruh ia ka shuki Chariman jong ka Hill Area Committee jong ka Manipur Legislative Assembly ha ki snem 1985 haduh 1989.
Nalor kane, u la bat ruh ia ka shuki Chairman jong ka Autonomous District Council jong ka distrik Ukhrul ha ki snem 1975 haduh 1978.
U Mingthang u long ruh uwei na ki nongseng jong ka United Naga Council bad ka Lui-Ngai-Ni Festival jong ka kynhun jaitbynriew Naga hapoh Manipur ha ki por ba la leit.
