Gangtok, Lber:
Ka sorkar Sikkim ka la pynbna ia ka lad jingiarap kaba long haduh 1.3 lak sha ki arngut ki trai jong ki iing kiba la duhnoh ia ka iing jong ki na ka daw jong ka jingtwa khyndew ha kaba kane ka la jia ha shnong Sokpay kaba hap hapoh Dikchu Zang Block jong ka Gangtok district.
Katkum ka kaiphod ba la iohlum la iathuh ba ka jingjulor na ka daw jong kane ka jingtwa khyndew ka la long kaba shyrkhei bha bad kaba la ktah jur ruh ia ka National Highway kaba pyniasoh bad ka North Sikkim.
Haduh 18 tylli ki longiing ki la hap ban mih noh na la ki jong ki iing ki sem na ka daw jong kane ka jingtwa khyndew ban lait na ka jingma bad katkum ka jingiakren jong ki bor ba dei peit bad ki nongthoh khubor ka jingtwa khyndew kam dei satia na ka daw jong u slap namar ba ym shim la hap slap satia bad kane ka jingtyrwa ka lah ruh ban dei namar ka jingtyrkhong palat ka khyndew. Ki nongshong shnong ki la kynnoh ba ka daw jong kane ka jinghap slap ka lah ban dei namar ba la tei ia ka Powerline Tower halor jong uwei u lum ha kaba kala don ruh ka NHPC dam ha ki bynta ba sha trai. Kane ka 1.3 lak kaba la ai jingiarap da ka sorkar Sikkim sha ki artylli ki longiing kiba la ngat ha kane ka jingjia ka long 40,500 sha u nongri masi bad kumba 25,000 pat sha u trai jong kawei ka iing.Hadien jong katei ka jingtwa khyndew ba shyrkhei u Tushar Nikhare uba long u Gangtok District Magistrate ula leit ban jurip ia katei ka jaka ha ryngkat ki katto katne ki longiing jong ka Gangtok District.
Ki lad pathai khubor ka Sikkim ki iathuh ba kan shim por haduh 2-3 sngi ban pynkhuid ia ka National Highway bad hadien kane yn sa ailad biang ia ki kali ba kin iaid kumba ju long barabor. Hadien jong katei ka jingtwa khyndew haduh 15 haduh 20 tylli ki iing ki la mad ia ka jingduhnong bakhraw namar ka jingbym ioh bording shuh bad kumjuh ruh ka umbam.Ka Manju Sharma kaba long kawei na ki nongshong shnong ha ka jingiakren bad ki nongthoh khubor ha kaba iadei bad kane ka jingjia kala ong ba ki heh ki la wan survey ha kine ki snem ba la leit ia ka jaka kaba twa khyndew bad phah ruh ia ki nongshong shnong ba kim dei ban shna iing hangne naba ka lah ban wanrah ka jingma bakhraw ia ka jingim jong ki.
