Dimapur, Lber:
Khat-ar (12) tylli ki seng trai muluk na ka jylla Nagaland ha ki khyndiat sngi kiba la leit noh ki la pynmih da ka jingmaham ba kin nym leit ïashim bynta ha ka iekshon Urban Local Body (ULB) kaba la buh ban pynlong ha ka 26 tarik u Jymmang, 2023.
Kitei ki seng trai muluk ki la byrngem ba kin nym leit ban ïashim bynta ha katei ka ilekshon lada ka sorkar kan nym lah ban pyntreikam noh ïa ka Nagaland Municipal Act 2001. Nangta ki la ong ruh ba ka sorkar jylla ka dei ban khmih bniah sa shisien halor ki kyndon kiba ïadei bad ka Nagaland Municipal Act 2001.
Kat kum ki jingïoh lum jingtip la ïathuh ba katei ka jingdawa jong kitei ki 12 tylli ki seng trai muluk ka dei kawei na ki 7 tylli ki mat jingdawa ba la wanrah ha ka jingïalang syllok kaba la pynlong ha ka Lah Sngi U Blei ba la dep ha nongbah Kohima.
Ha katei ka jingïalang, na ka liang kitei ki seng trai muluk ki la pynbna ruh ba kin ai ïa ka jngkyrshan kaba pura ïa ka sorkar jylla ban pynlong ïa katei ka ilekshon ULB lada ka sorkar kan lah ban pynurlong ïa ki mat jingdawa jong ki.
Ki mat jingdawa kiba kitei ki seng trai muluk ki la phah sha u Myntri Rangbah Neiphiu Rio ki kynthup ruh ïa ka jingthoh lane jingpynbeit ïa ki katto katne tylli ki kyndon aiñ kiba lah ban ktah ïa ka Article 371 (A).
Na ka liang ki tei ki seng trai muluk ki la dawa ruh na ka sorkar jylla ba ka dei ban wanrah ïa ka rai kaba pura khnang ba ka jingmang kyrpang kaba 33% na ka bynta ki ‘riew kynthei kan nym ktah ïa ki kyndon jong ka Article 371 (A) hashwa ban pynlong ïa ka ilekhson ULB.
Ki la daw ruh ba ka sorkar jylla ka dei ban ai ïa ka jingbatai kaba bniah halor ki mat kiba ïadei bad ka por ban pyntrei kam ïa ka jignmang kyrpang na ka bynta ki riew kynthei (30%). Ki la ai jingmut ba ka por trei kam (tenure) na ka bynta katei ka jingmang kyrpang kam dei ban tam ban ïa ka 2 samoi.
Shuh shuh ha ka jingïalang na ka liang kitei ki seng trai muluk ki la dawa na ka sorkar jylla ba ka dein ban pyntip sha ki paidbah nongshong shnong ka jylla halor ki kam tohkit jong ka Joint Inquiry Commission halor ka jingjia kaba la jia ha ka 31 tarik u Kyllalyngkot, 2016 ha Daimapur ha kaba ki la don ruh haduh 2 ngut ki ‘riew paidbah kiba la shah pynïap.
