Gangtok, ïaïong:
U Myntri Rangbah jong ka jylla Sikkim, u Prem Singh Tamang ha ka 31 tarik u Lber u la pyntip ba ïa ka Dorbar kaba kyrpang jong ka Ïing Dorbar Thaw Aiñ jong ka jylla yn sa pynlong ha ka 10 tarik u Ïaïong, 2023.
Kat kum ka jingïoh lum jingtip la ïathuh ba ïa katei ka Dorbar kaba kyrpang la khot ban pynlong na ka bynta ban ïatai bad ïasyllok halor ki mat kiba ïadei bad ka kyntien ‘Sikkimese.’
Kat kum ka kyrwoh ba la pyllait da u Jacob Khaling – nongaiktien jong ka seng SKM u ba dei ruh u political secretary jong u Myntri Rangbah ka jylla u la pyntip ba na ka liang ka SKM ka khmih bniah bad sngewkhia halor ka mat kaba ïadei bad ka jingithuh kyrpang, ka jinglong jingman, ki lad jingïada bad kumjuh ruh na ka bynta ka hok jong ka jylla Sikkim bad ki nongshong shnong jong ka. U la ïathuh ba na ka liang ka sorkar jylla ka la khot ban pynlong ïa katei ka dorbar khnang ban ïatai halor ki mat kiba donkam jong ka jylla bad jong ka jaitbynriew – kaei ka nongrim jong ka sorkar halor kitei ki mat bad kiei ki lad kiba la sorkar jylla ka don ban leh eiei na ka bynta ka bha ka miat jong ki nongshong shnong ka jylla Sikkim.
Da kaba kynthoh ïa ka sorkar kaba rim (SDF), na ka liang u Khaling u la ong ba ki riew paidbah jong ka jylla ki tip shai ba kane ka sorkar kaba mynta ka la ïakynduh ïa shibun ki diengpyngkiang na ki jingbakla ba bun jong ka sorkar jylla kaba rim halor ki mat kiba ïadei bad ka hok bad ka bha ka miat jong ki nongshong shnong ka jylla. U la ïathuh pat ba ha baroh kitei ki diengpyngkiang, na ka liang ka sorkar jylla ka la shim ïa ki sienjam kiba bha tam ban ïada bad pynneh pynsah ïa ki hok bad ïa ka jingithuh kyrpang ïa ki paid nongshong shnong trai muluk jong ka jylla.
