Aizawl, ïaïong:
Ki bor sorkar jong ka jylla Mizoram ha ki khyndiat sngi kiba la leit noh ki la pyntip ba ki la don haduh 74.26% ki nongthep ‘vote’ kiba la wan ban ïashim bynta ha ka ilekshon Municipal Council kaba nyngkong eh jong ka thaiñ Lunglei ïa kaba la dep ban pynlong ha ka Sngi Balang kaba la dep.
Kat kum ka jingïathuh jong ki bor sorkar ka tnat pynïaid ilekshon jong ka jylla Mizoram, ki la pyntip ba ha ka thaiñ LMC ki don baroh haduh 40,548 ngut ki nongthep ‘vote’ kynthup ïa 21,245 ngut ki nongthep ‘vote’ kiba dei ki ‘riew kynthei.
Kat kum ka kyrwoh ba la pyllait da ka tnat ilekshon jong ka jylla la pyntip ba tad haduh ka por 4 baje janmiet ba la pynkut ïa katei ka ilekshon, ki don baroh haduh 74.6% kiba la wan ban ïashim bynta ha katei ka ilekshon LMC.
Ïa katei ka ilekshon la pynsdang ha ka 7 baje mynstep ha ka sngi Balang bad ha ki 9 kynta ba la pynlong ïa katei ka ilekhson, kim shym la don satia kino kino ki jingjia kiba la wanrah ïa kino ki jingklumar na ki jingjia kiba wanlam ïa ki jingsngewsih.
Ki la don kumba 165 ngut ki nongpynïaid ilekshon kiba la wan ban ïashim bynta ban pynïaid ïa ki kam ilekshon bad 158 ngut ki pulit kiba la wan ban pahara ha katei ka sngi ba la pynlong ïa ka ilekshon.
Ha katei ka ilekshon la ïakhun da ki 42 ngut ki kyrtong. Na ka liang ka seng Mizo National Front (MNF), ka Zoram People’s Movement (ZPM) bad ka seng Congress ki la pynïakhun ïa ki kyrtong na man la ki 11 tylli ki thaiñ, katba ka seng BJP pat ka la pynïakhun ïa ki kyrtong na ki 9 tylli ki thaiñ.
Ïa ka jingñiew ‘vote’ na ka bynta katei ka ilekshon la buh ban pynlong ha ka 3 tarik mynta u bnai.
Kum ban shu ïathuh hangne, ïa ka LMC la thaw da ka sorkar MNF ha u snem 2022 hapoh ka jingïalam jong u Myntri Rangbah Zoramthanga.
