Silchar, ïaïong:
U dkhot barim jong ka kynhun lehnoh Bru Revolutionary Army of Union (BRAU) u Joiba Reang, uba la don 35 snem ka rta bad uba la jah rngai naduh ka 24 tarik jong u Lber, la lap pat ia ka met iap jong u na kawei ka khlaw ha ka janmiet sngi Thohdieng.
Ki tyllong khubor ki la iathuh ruh ba ki dkhot jong ka kynhun jaidbynriew Reang ki la lap ia ka met iap jong u Joiba na katei ka khlaw ha Harharikhal ha ka janmiet jong ka sngi Thohdieng bad kumta ki la pyntip mar-mar sha ki pulit jong katei ka thaiñ tang mar ia iohi ia katei ka metiap ha katei ka sngi.
U heh pulit ka Dholai Police Station, u Manoj Baruah ryngkat bad u magistrate B. Chetri bad ka kynhun pulit ki la leit mardor sha katei ka jaka ha kaba ki la lap ia katei ka metiap kaba la pyut ruh ha katto katne ki bynta. Kumta, ia katei ka ka met la pynkit noh sha Silchar Medical College & Hospital (SMCH) naka bynta ban pyndep ia ka post-mortem.
Ki pulit ki la iathuh ba ha katei ka sngi, ki la ioh kurup ruh ia ka torch light bad kawei ka tiar ba nep najan ka met jong u Joiba.
Haba iakren bad ki lad pathai khubor, u heh pulit Manoj Baruah u la iathuh ba ia ka post-mortem jong u Joiba la dep ban leh bad tad haduh ka step Sngi Saitjaiñ ki dang ap pat ban ioh sa ia ka kaiphod ba iadei bad kane. Shuh shuh ruh la ong ba ym lah ban ithuh shai ba kumno u Joiba u la khlad bad kumta dei tad haduh ban da la dep leh ia ka post mortem yn sa lah ban tip shai ia ka daw jong ka jingkhlad jong u.
Hynrei na ka liang ki bahaiing u Joiba, la ong ba ki don ki dak mynsaw ha ka met jong u bad kumta ruh la sgnewthuh ba kane ka pyni ba u la shah pynshitom bad shah pyniap.
