Guwahati, ïaïong:
Naba ka jingthwet ïa u nongkyrshan jong ka Khalistan u Amritpal Singh ka dang ïai bteng, u lehnoh ba la tip kyrteng kum u Gurpatwan Singh Pannu jong ka kymhun Sikh for Justice (SFJ) u la phah ka khubor byrngem pyrshah ïa u Myntri Rangbah jong ka Assam u Himanta Biswa Sarma.
Ïa kane ka khubor la phah sha ki nongthoh khubor jong ka Assam. Kum shi bynta ban byrngem pyrshah ïa u Myntri Rangbah u Pannu u la ong, “Ki nongkyrshan jong ka Khalistan ki la shah set patok ha Assam bad shah pynshitom beiñ. Sa sngapthuh bha, Sarma, ka jingïakhun ka la long hapdeng ki Sikh kiba kyrshan ïa ka Khalistan bad ka sorkar India”.
Ha ka khubor byrngem, u General Counsel jong ka SFJ u la ong, “Sarma, wat ym long u lanot ha kane ka jingïaleh.”
“Ngi la dawa ïa ka jinglaitluid jong ka Punjab na India lyngba ka jingpyntreikam katkum ka synshar paidbah jong ka jingjied ki paid nongshong shnong ka Khalistan.
Lada ka sorkar jong phi ka pynshitom beiñ bad leh tohmet ïa ki 6 ngut ki nongïarap jong u Amritpal kiba la shah set patok ha ka patok ha Dibrugarh phin long u nongkitkhlieh,” la bynrap u Pannu.
Ka jingïakhun jong ki pulit pyrshah ïa u Amritpal Singh bad ka seng jong u ka ‘Waris Punjab De’ ka la sdang naduh ka 18 tarik, Lber, khyndiat taïew hadien ba ma u bad ki nongkyrshan jong u ki la leit tur sha ka jaka treikam jong ki pulit ka Ajnala kaba don hajan Amritsar halor ka jingdawa ban phah pyllait noh ïa u briew uba la shahkem.
Ha kaba ïadei bad kane, u Amritpal Singh u la ïohlad ban phet bad lait na ka jingshahkem ha ki pulit ha kaba haduh mynta la ïohi ïa u ha kylleng ki jaka lyngba ki CCTV Camera ha kaba u la ïaleh ban pynkylla dur bad riam da bun sien, la ïathuh ki pulit.
